Yeat No.1 album hmasa ber ‘Lyfestyle’

Yeat No.1 album hmasa ber ‘Lyfestyle’
Yeat chuan a vawi khat nan Billboard 200 (albums) chart-a No.1 thei album a nei ta a, a album thar ‘Lyfestyle’ chu chart No.1-ah a debut,. Hetihrual hian K-pop group SEVENTEEN pawh top 5-ah an debut a, Gracie Abrams pawh top 10-ah a rawn lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Lyfestyle hi kar khat chhungin 89,000 hralhin, chung zinga 60,000 chu album tak tak hralhna a ni a, streaming atangin 29,000 (on-demand official stream maktaduai 39.67) a tling thei a, album-a hla mal hralhna chu chhiar tham a ni lo thung.
Rapper Yeat hian chart top 10-a lang thei album panga a nei tling ta, No.1 hi a vawi khat kaina niin, kumin March thla khan a album ‘2093’ chu No.2 a lo kaipui tawh bawk.
Chart No.1 hlui Sabrina Carpenter ‘Short n’ Sweet’ chu 79,000 hralh lehin No.4 atangin No.2 a kai thar leh ta a, kar kalta chart No.1-a rawn debut, Jelly Roll ‘Beautifully Broken’ chu 68,000 hralh lehin No.1 atangin No.3-ah a tawlh a, chart No.2-a rawn debut Rod Wave ‘Last Lap’ chu 67,000 hralh lehin No.2 atangin No.4-ah a tawlh ta bawk.
K-pop group SEVENTEEN album tar ‘SPILL THE FEELS’ chu 66,000 hralhin No.5-ah a debut a, an album he chart top 10-a lang thei parukna a ni. An album thar hralhna hi 64,000 chu album tak tak hralhna niin, streaming atangin 2000 (on-demand official stream maktaduai 2.61) a tling a, album-a hla mal hralhna chu chhiar tham a ni lo.
Chart No.1 hlui Morgan Wallen ‘One Thing at a Time’ chu No.9 atangin No.6 a kai thar leh a, GloRilla ‘Glorious’ chu 50,000 hralh lehin No.5 atangin No.7-ah a tawlh ve ta thung.
Gracie Abrams album ‘The Secret of Us’ chu 49,000 hralh lehin No.19 atangin No.8 a kai thar leh a. He album hi July tla khan No.2-ah a debut tawh a, October ni 18 khan he album hi a deluxe version tichhuak lehin, chu chuan album hralh a tikal thar leh ta a ni.
Billie Eilish ‘Hit Me Hard and Soft’ chu 48,000 hralh lehin No.7 atangin No.9-ah a tawlh a, BigXthaPlug ‘Take Care’ chu 48,000 tling lo deuh hralh lehin No.8 atangin No.10-ah a tawlh ta bawk.