MBSE buatsaih, Higher Secondary School Leaving Certificate Examination 2026 result chhuakah zirlai exam hmachhawn mi za zela 87.67 an hlawhtling a, kum hmasa aia pass percentage san zawkna hi zaa 6.57 a ni.
Kar kaltaa HSLC exam 2026 result pass percentage pawh kha 80.31% a ni a. Kumin hi matric leh pawl sawmpahnih result that tlan ber tum a ni mai awm e.
Tun tum result bu tihchhuah dan hi tihdanglam a ni a, tunhmaa division, mark hmuh zat, top ten leh letter hmuh dan tarlan thin ang kha hmuh tur a awm tawh lo. A pumpui result— ‘overall pass percentage’ atang ringawt hi chuan, zirlaite quality teh a harsa deuh awm e. Overall pass percentage a hniam deuh tum pawh khan, division lamah— distinction leh first division-a pass an tam chuan lung a awi a, pass percentage a san viau tuma distinction leh first division an tlem chuan lung a awi kim lo deuh thin. ‘Helaiah hian tan lak kan ngai zual a nih hi’ tia hmasawnna tur rahbi hriat chian te kha thil pawimawh tak a ni awm e. Tuna result bu atang hi chuan, mahni sikul theuhte result kan hrechiang a, mahni sikul intehna (assessment) atan chuan a tha tho ang; mahse, Mizoram pum huap tehna tur chipchiar tarlan a ni ta lo erawh, mipui tan a hrilhhai thlak deuh awm e. Result bu chu eng pawh lo ni se, lo dah tha ta ila.
A pawimawh ber chu, chhawr tlaka zirlaite chher chhuah hi a ni. Kan inzirtir dan (teaching & learning method) hi a pawimawh ber a. Exam hi chu exam a ni a, memory chak deuh leh taima deuh tan chuan mark hmuh teuh theih a ni. A chhan chu, mahni zirlai hrethiam chuang si lovin exam zawhna hi chhan dik theih a ni. Chutianga mark sang tak hmua pass percentage sang tak hmu thin zirlai ai chuan, second division-a pass, mahse a zirlai awmzia hrechiang, a hnu lam thleng pawha chhawr tangkai thiam quality chu a sang zawk tihna a ni. He quality hi hna zawnnaa ‘interview’ hunah a takin a lo lang chhuak thin.
Chhawr tlak loh zirlai, central services hrang hranga tribal quota pawha inziak tling hleithei lo a sing rual awm khawm ruih ringawt ila, “Overall pass percentage chu a sâng thin asin mawle” tih hi a ropui viau dawn lo tihna a ni.
Kan zirlaite quality dik tak hi chu, overall pass percentage sang ringawt atanga teh hleih theih a ni lo va, ngaih tih that ngawt pawh a ngamawm tehchiam lo. Zaa 80 chung lam hmuh theih hi a lawmawm; mahse, kan zirlaite hi hman tlak/chhawr tlakin kan chhuah thin em tih hi pass percentage aia ngaih pawimawh zawk tur niin a lang. An zirchhuah hnua an eizawnna te hi kan education quality lan chianna ber tur a ni mai lo maw?
Zaa 80 chung lam hi….
