Zalen taka vote thlak theih…

Democracy ram inthlannaah chuan mipuiin mahni duhthuin zalen takin vote kan thlak thin. Chutih rual in, vote kan thlak dawn hian kan rilru a zalen chiah em tih hi zawhna pawimawh tak a ni awm e.
Rilru zalen taka vote thlak tur chuan miin ngun takin ram inrelbawlna kalphung (politics) a ngaihvenin a hrechiang thawkhat ve tur a ni. Hei hian a kawh ber chu – ram rorel hna thawk mek sawrkarna chelhtuin ram a kaihhruai dan kalphung, sawrkarin hmasawnna hna a thawh dan, ram leh mipui a enkawl dan, hmathlir a neih dan etc. a chikin a zirin chuta tang chuan tehna a siamin ngaihdan leh thutlukna amahin a siam ve thei thin tur a ni.
Election campaign laiin campaigner ten mipui rilru hneh tumin hmanraw chi hrang hrang an hmang thin a, chutah chuan thu dik tawk lo deuh te, document phuahchawp hmanga midang beih te, inhuatna lam thil te, dawt hmanga midang puh hmingchhiatna leh inhmelmakna lam thil etc. auchhuahpui duh an awm leh mai thin a. Hetiang hi dan chuan a khap avangin IPC leh RP Act 1951 hmanga hrem theihna dan section hrang hrang a awm a. Hengte hi mipui lam pawhin kan hriat chian a pawimawh a, chu chuan rilru fim min pe a, chu chu mahni inringtawk chunga midang ngaihdan leh thusawia innghat ringawt lova, mahni chhia leh tha hriatna thiang tak hmanga zalen taka vote kan thlak theihna tur a ni.
Kan ram dinhmun, ram hruaituten ram an kaihhruai dan, politics inlumleh dan etc. hi kan hriatchian a pawimawh a, hriatchian tum lova midang thusawi ringawta kan innghah chuan, zalen takin vote kan thlak thei dawn lo tihna a ni. Miin min vauin min tilui lo mah se, mahnia ngaihdan kan siam theih loha midang ngaihdan leh duhdan zawm mai mai chunga vote kan thlak a nih chuan, midang sal behna hnuaia vote thlak ang kan ni tho tho dawn a, ‘vote thlak ve hrim hrim’ ringawt hi chuan vote hlutna a nih dan tur angin a phawk chhuak zo lo a ni.
Chuvangin, zalen tak leh mahni inringtawk tak chunga vote thlak thei turin ram inrelbawlna kalphung hi mipui hian ngaihvenin i zir chiang ila, chutiang chunga vote kan thlak thin a nih ngat chuan, ram inrelbawlna tha hi kan nei em em ang.