Thisen vawi 100 a pe tawh a, ngaia neih tawh awm tak a nih laiin ngaiah a la neih thei lo, a la zam ziah! Zam chungin thisen a pe thin a, vawi 100 a pe ta.
C Lalremruata a ni a, Mizo zinga thisen pe hnem ber a ni – July ni 24, 2026-ah a vawi 100 nan thisen a pe.
Thisen a pek hmasak ber chu 1998 kha a ni a, hemi hnu hian kum khatah vawi thum emaw vawi li emaw a pe ziah. January-ah a pek chuan kum khatah vawi li a pe thei a, a nih loh chuan vawi thum.
Kum 28 dawn chu chutiang chuan thisen a pe tawh a, mahse a la zam ziah! Inchiuna hriau hlau chi a ni a, thisen la tura hriau vih luh leh HB test tura hriau vih luh hi ngaiah a la neih thei lo!
“Hlau chung chungin thisen hi ka pe thin ti ila a dik ang. Hriau hi ka hlau tlat a, ka hmuh ringawt pawhin ka zam thei,” a ti a, “Ka hlau lo telh telh chuan ka hria a, mahse ngaiah ka la neih thei lo, ka la zam ziah. Min rap zual chang te pawh a la awm,” a ti bawk.
“Zam chung chunga thisen hi pe ka ni a, hetia ka hlauh zawng tak ka ti thin hian tumruhna min pe a, pek zel tumna neih hrim hrim pawh hian tumruhna min pe,” tiin a sawi zawm a ni.
Thisen a pek tan dan hi, 1996-ah a pi (a pa nu) Lalchhingi thisen pek a ngai a, a pi chuan a tupa Remruata thisen dawng se a dam a inring tlat mai a, mahse kum a la tlin loh avangin Remruata hian a pe thei lo. Chu chuan a rilru a kam a, a pi chuan mi dangte thisen pe thin turin a chah bawk.
A pi thu chu awihin thisen pe thin nih a tum ta a, 1998-ah a tan ta a ni. Khatia July ni 24-a a vawi 100-nana a pek pawh khan a pi hi a hrechhuak vang vang lo thei lo.
“Pathian zar liau liau a ni, hetia vawi 100 ka pe thei hi Pathian zar, Pathian vang chauh a ni, Pathianin min awmpui vang a ni,” a ti a, “Vawi 100 ka’n pe kha chu, ka lawm lutuk a, ka pi ka hrechhuak bawk a, lung te pawh a chhia a,” tiin a sawi zawm a ni.
Pathian zarah a hrisel tha a, thisen hi a pe thei thin tih chu a sawi dan a ni a, hetia vawi 100 a pek chhung hian vawi khat chiah pek theih loh a nei. A vawi 98-na turah khan a ni a, an vengin mitthi an neih avangin a tlaivar a, a tuk leh zanah a tlaivar leh bawk. Chumi tum chuan a pe thei ta lo a, a vawi 98-na hi an sawn ta a ni.
“Pathian zarah insawiselna ka nei lo. Thisen ka pek zawhah hian ka tih tur ka ti thei leh nghal mai zel a, han chauh deuh pawh ka nei lo a, ka lawm khawp mai,” a ti. A vawi 100-nana a pek pawh hian, a pek zawhah a tih tur a ti leh nghal mai.
Thisen a pe thin hi a hlimpui tih a sawi a, “Thisen pek hi ka hlimpui. Pathian thu zawngin han sawi ta ila, Lal Isuan a thisenin min tlan a, kan thisen vanga dam an lo awm ve a nih chuan, chu chu thil lawmawm a ni,” a ti. “Thisen mamawh hi an tam a, Aizawlah blood bank pathum a awm a, chumi ring chu kan thahnem a, a petu kan pun ve zel hi a ngai,” a ti bawk.
Zam chunga vawi 100 a pek hnuah pawh Remruata hian pek zel a la tum a, thisen pek hi a vei telh telh emaw tih tur a ni. Mipuiin vei se, thahnemngai se a duh a, a pek bakah a campaign lamah pawh hlawk taka inhman a chak.
Zam chungin thisen vawi 100 pe thei
