Hnam dangin hre lehzual se ‘nghah loh dawr’ hi Mizote tihmingthatu pawimawh a ni thei ang. A hriate chuan mak an ti a, ropui an ti. Nghah loh dawr tluk thuak pawh a tam mai.
Khaw kar kawnga thil zuarte hian zanah an hawsan mai a, an hawsan loh pawhin a bulah puan phahin an riah chilh tlangpui ang. Khualzin an awm reng a, duh tawkin thil an ru thei ang. Mahse thil a bo ngai lo an ti.
Serkhan daia Zairumkawnah chawhmeh leh nepnawi zuar an thu tlar a, zan lamah chuan puan inzar hliahin a sirah an mu mai thin. Kaihthawh theih reng an ni a, thil lei duh chuan an kaitho mai. Kaitho lova an thil duh lei mai pawh an thahnem a, chuvangin zan lamah chuan nghah loh dawr ang a ni.
An sawi danin, zan lamah hian a zin thang deuhte chuan an kaitho mai a, zan rehah pawh an kaitho ngam. Kaitho lova thil lei pawh an tam a, tin, thil an lei emaw lei lo emaw, an dawr kawta tlan tlang an awm zankhua a, thil a bo chuang lo.
“Hmanah tawh khan, a rei tawh mai, kan chhak deuha inzuarte cigarrete hi a bo a, police-in a rutu an man a, damdawi ti thin an lo ni a. Kan centre fresh a bo tawh bawk a, kha kha chu bovah pawh ka ngai lo. Chung chu thil bo tia sawi theih ka hriat chu a ni mai,” tiin he hmuna chawhmeh leh nepnawi zuar pa pakhat chuan a sawi.
“Tlan tlang hi an tam a, tlan tlangte hian duh se chu kan muthilh laiin an duh duh hi an ru thei a, a chiang reng a. Tin, kawng zau lai te a lo ni a, an mutchhuak tawngkhawng hi kan kawtah hian motor tidingin an muhil thin bawk a, anni pawhin duh tawkin an ru thei ang. Mahse thil a bo ngai lo,” tiin an dinhmun a sawi a ni.
“Zana min kaitho lova thil lo lei pawh an thahnem a, a chang phei chuan chhunah aia zana kan inhralh hnem chang te pawh a awm. Min kaitho lova thil lei hi an thahnem a. Pawisa dahna tur hi a hranin kan siam lo a, pawisa chu a remchan dan angin an lo delh bet mai thin a,” a ti bawk.
Relin Sairang a thlen hnuah lirthei veivak a tlem ta deuh tih an sawi a, a hma phei chuan lirthei veivak a tam lehzual a, mi chi tin an tlan tlang chunga thil a bo ngai loh thu te, tunah pawh a hma angin tam ta lo mah se lirthei a la tam tho a, an thil zawrh a bo ngai lo chu lawmawm an tih thu an sawi. Chutih rual chuan bo lo tura an ngaih avangin a bo lo pawh hi mak an tih loh zawk thu te an sawi bawk.
“Mi hi an fel, heng kan thil zawrh hi lo la se kan hre lo ang. Kan muttui vanglai phei chuan thawm dim miah lo pawhin an ru thei ang. Mahse an ru ngai lo. Vai pawh an tam a, ruk loh turah an ngai ve tho a ni ang,” thil zuar pakhat chuan a ti.
Zanah pawh thil a bo lo

