President Volodymyr Zelenskiy-a chuan Russia-in na zawka an ram laka beihpui thlak tuma a vau thar mek laiin US President Donald Trump-a chu Ukraine hnenah air defense system leh interceptor (van sang atanga beihna lo kah letna) hmanga pui turin a ngen a, ballistic missile chu Moscow-in ‘indona hmuna a a chak zawkna thar ber’ a nih thu a sawi.
Trump-a leh US Congress hnena lehkha a thawnah Zelenskiy-a chuan, “Russian missile laka Ukraine van boruak venhimna kawngah in tanpuina ka dil a. Ukraine hian Patriot system leh interceptor missile kan mamawh zat lei turin a inpeih tih kan rawt tawh a ni,” a ti.
Ukraine-in Russian ballistic missile a kah thlak theihna a neih awmchhun chu Patriot air defense system-a hman tur US siam interceptor a ni a. Kum li chhung indona a awm tawh chhung zawngin Kyiv hian interceptor a tlachham hle a, Iran-a indona chhuakin an neih theihna a ttlem lehzual a ni.
Trump-a’n US-a thuneihna a chan atang khan Ukraine hian NATO hmalakna, Prioritized Ukraine Requirements List (PURL) hmangin Patriot missile a lei tan a, hei hi European tangrual ramte sum hmanga lei a ni.
“Tuna PURL program hmanga ralthuam kan dawn dan hi kan hun tawn hlauhawm tak nen a inmil tawh lo a ni,” tiin Zelenskiy-a hian a lehkhaah a ziak a ni.
“Keini – dam khawchhuahna tura beitu hnam tan chuan – Patriot battery-a missile phurh loh aia hrehawm zawk hmuh tur a awm lo,” a ti bawk.
President Zelenskiy-a’n US-a lehkha a thawn hi Ukrainian chanchinbu, The Kyiv Independent-in a tar lang hmasa ber.
Russia hian Pathianni khan Ukraine beihpui thlakna hnuhnung berah ballistic missile 30 hmangin a kap a, heng zinga 11 chauh hi kah thlak a ni tih Ukrainian air force-te chuan an sawi.
Zelenskiy-a chuan Moscow sipaite hian beihpui thlakna atan hian nuclear chakna hmang thei intermediate-range ballistic Oreshnik missile pahnih an kap chhuak tel tih a sawi bawk.
“Pakhat chuan Kyiv region a rawn nuai a, pakhat chu hi Ukraine-a hun eng emaw chen an lo luah lailawk tawh, Donetsk region-ah a tla niin an sawi,” a ti.
Lehkhaah hian Ukrainian hruaitu chuan Russia-in a beihpui thlakna do letnaa Ukraine hlawhtlinna pawh a tar lang a, kum nga indona tling tawhah hian US a thlawpna avangin lawmthu a sawi bawk.
“Engpawh ni se, Putin-a hian ralthuam pangngaia awmze nei tak pakhat lek pawh a la neih chhung chuan palaia inbiakna pangngai chu a la pumpelh zel dawn a. Tunah chuan a ballistic missile-te chu a ralthuam neih a la ni a — indona hmuna a keini aia a chak zawkna thar ber a ni,” tiin Zelenskiy-a chuan a ziak bawk.
Zelenskiy-a’n Trump-a hnenah ralthuam a dil belh
