Zelensky-an Russia ram chhung an luh thu sawi chiang ta

Ukrainian President Volodymyr Zelensky chuan a tum khat nan Ukrainian sipaite chuan Russia western kursk region an beih thu a sawi ta a.
Zelensky chuan television kaltlanga thupuanna a neihah Ukraine military te chuan hmelmate ram chhung kan lut tawh tiin a sawi.
Ningani kal ta khan Ukraine chuan operation nei tan tawhin Russia a barakhaih hle a ni. Hetihlai hian Pathianni khan Russia chuan Ukraine capital Kyiv leh Sumy region chu missile-in a bei ve thung a.
Russian beihna avang hian Kyiv khawpuiah kum 35 a upa leh kum li leka upa naupangin nunna an chan phah a. Mi pathumin hliam an tuar bawk.
Ukraine sipaite hian Russia ram chhung 10km vel an lut tawh nia sawi niin February 2022 a Ukraine-in run a tawh hnua Russia ram an luh thuk ber a ni bawk.
Kursk-ah hian mi 13 velin Ukraine chetlakna avang hian hliam an tuar niin acting governor Alexei Smirnov chuan a sawi a.
Ukraine ramri hnaih atangin Russia chuan mi 76,000 vel hmun himah a thiar tawh niin Russia state Tass news agency chuan a sawi bawk.
Russia National Counter-Terrorism Committee chuan Ukraine hnaiha region pathumah ‘counter-terrorism operation’ chu karkalta Zirtawpni atang khan an tan tiin an sawi bawk a.
Chumi awmzia chu Kursk, Belgorod leh Bryansk region a cheng te chu an chet vel theih dan khuahkhirhsak niin an phone thlengin ngaihthlak ruk theih a ni dawn a ni.
Russia chuan a hma pawhin kar kalta Thawhlehni zing lamah Ukrainian sipai 1,000 vel leh tank leh armoured vehicle te nen Kursk region an lut a lo ti tawh a. Ukrainian sipaite chuan khaw tam tak la tawhin regional town lian ber Sudzha pawh lakah an vau tia sawi a ni bawk.
Sudzha bul lawk 7km vel leka hlaah Russian gas facility lian tak Gazprom company te ta a awm a, Ukraine sipai te chuan he gas facility hi an thunun tawh tia sawi a ni.
Kursk region-ah hian Moscow chuan reinforcement tirlutin chung zingah chuan tank leh rocket-launcher system te pawh a tel a. Russian defence ministry chuan an sipaite chuan Ukrainian sipaite chu an nawr let zel tiin a sawi bawk.