Zin nana sum sen a pun laiin US tlawhtu tlahniam

Kum hmasa aia zin veivah nana sum sen 6.7%-a a pun laiin kum 2025 chhunga ram dang atanga US tlawhtu erawh 6% velin an tlahniam thung.
Kum 2025 chhung khan khualzin tluklehdingawn 1.5 chuangin khualbuka thlenna, lawng liana zinna leh thlawhna man atan $ vaibelchhe nuai 11.7 vel an seng niin World Travel & Tourism Council (WTTC)-in a sawi.
Tourism industry hian nikum chhung khan khawvel pum sum thawh chhuah 10.3% a tum phak a, zin vel nana sum sen bik hi khawvel sum leh pai than dan bi let thawkin a thang thung niin WTTC chuan a sawi.
Zin zingah, a bikin thalai zawkte chuan US-ah pem lutte um chhuah beihpui an thlak nasat avangin an an tlawh tam lo va. European rama Spain leh France vel leh Japan pawh an thlang zawk niin WTTC president lailawk leh an CEO, Gloria Guevara-i chuan a sawi.
Colombian leh Mexican telin, Latin American-ten US hi an tlawh tlem hle a, Mexican zinga a zente pawhin rei lo te chauh an châm thin niin Guevara-i chuan a sawi.
Ram dang mi tlawhtu zat tlem hret mah se US hi khawvela ram tlawh tam ber pathumna a ni a, a hma kum aiin an ram tlawh tura khualzinte sum sen hi 7%-a tlem zawkin Canada, Mexico leh Europe atanga tlawhtu an tlahniam nasa niin WTTC chuan a chhut.
Hetih lai hian an ram chhung miin an ram chhung veka an zin kual erawh kum liam ta khan a tam hle thung a, US hi khawvela travel & tourism economy-ah chuan khawvela a lian ber a la ni phak tho a ni.
WTTC chuan kuminah hian tourism industry hi 4.5%-a thang turin an chhut lawk a, khawvel pum eibar dinhmun thanna aia thang tha zawk turin an chhut.
France chu nikuma ram dang atanga tlawhtu ngah ber niin mi maktaduai 105-in an tlawh a, Spain-in dawtin tlawhtu maktaduai 96.5 an nei bawk niin WTTC hian a chhut a. US erawh chuan tlawhtu maktaduai 68 vel a nei a ni.