Mizoram thalai, a bikin zirlaite kan thawh hma a, zingkar hun kan hman tangkai a tul tih Sports & Youth Services (SYS) minister Lalnghinglova Hmar chuan a sawi.
Zirtawpnia Govt. J. Thankima College (GJTC) Students’ Union buatsaih Annual College Week kharna a hmanpuinaah Youth Services minister chuan, India ram khawchhak kilkhawra awm Mizoram chuan state dang nena hrutrualin Indian Standard Time (IST) kan hmang a. Kan thlang lawka awm Bangladesh aiin darkar chanve in kan tlai a, ramri kan tawmpui Myanmar aia darkar khata kan tlai sa bawk avangin midang ruala ke pen tur chuan zingkar atanga hun hman tangkai a pawimawh hle tih a sawi. Zirlaite chu zing tho hma a, an hun neih hmang tangkai turin a chah.
Govt. JTC zirlaite chu Mizoram chhung leh pawn hmun hrang hrang atanga kalkhawm, dinhmun inang lo tak tak an nih angin, lehkha zir tura Aizawl khawpui pantute chu an kal chhan hriaa social media leh nawmchenna dang buaipui loa hma sawn theihna tur thil tak tak ngaihtuaha buai zawk turin a chah a. Mahni nihna hrechianga zahpui lote chu khawvelin a ngaisang thin tih sawiin, zirlaite chu nakina dinhmun pawimawh tak tak chelh a, hnam dang leh ram dang mite hnena Mizoram leh Mizo chanchin phochhuaktu an la nih dawn avangin Mizoram chanchin, a bikin history, geography leh politics zir peiha hrechiang turin a chah.
College Week hi 2023 September 4-8 chhunga neiin, zirlai 1090 chu house parukah inthenin intihsiakna hrang hrang neih a ni.
Zing tho hma turin minister-in chah
