Zirlai intodelh inzirnaah
MICE School a titha ber
Samagra Shiksha Mizoram BH leh Tharthilthlentu (Tili) thawhdunna, intodelh inzirtirna Inter School Final 2024- 2025 chu Zirtawpni khan Aizawlah neih a ni a. MICE (Mizoram Institute of Comprehensive Education) School pakhat a ni.
Intodelh inzirtirnaa Samagra Shiksha Mizoram leh Tili thawhdunna hi 2024 July 1 khan bul tan a ni a. School 10 thlan chhuah hnenah pilot project kalpui a ni. Tun tumah hian heng school hi an project phochhuakin an intihsiak a; MICE, Govt KM HS, Govt Mizo HSS, Govt Zemabawk HSS, Govt KVM HS, Govt Hrangchhunga HS, Govt Central HS, Govt Republic HSS, Govt JL HS, Govt Chaltlang HSS an ni.
School thlan chhuah hnenah sumfai Rs 2000 theuh pek an ni a, chumi hmang chuan an theih ang angin bul an tan a, thil zawrh turte siamin an peipung a, hlawkna an hmuh dan leh an zir chhuah an sawifiah a ni.
Intihsiakah hian pakhatna chu MICE School, pahnihna Govt Chaltlang HSS, pathumna Govt Mizo HSS an ni a; pakhatna hian trophy leh sumfai Rs 25000, pahnihna in medal, certificate leh sumfai Rs. 15000, pathumna in medal, certificate leh Rs 10000 a keng a ni. Presenter tha ber Mary Lallawmawmi, Govt. Chaltlang HSS hnenah trophy, certificate leh Rs 5000 pek a ni bawk.
Final hmanpuitu Aizawl district education officer C Lalbiakzauva chuan Samagra Shiksha Mizoram leh Tharthilthlentu thawhdunna intodelh inzirtir chu hmasawnna a ni, tiin, zirlaiten chhungkaw khawsak tibuai loa anmahni tih theih ang tawk tih nachang an hriat a tul tih a sawi.
Zirlai intodelh inzirnaah MICE School a titha ber
