Zirlai ruk bo tamna Nigeria-ah
sikul hawn leh tan tum
November thlaa a hlawma zirlai ruk bo a thlen hnua venhimna thil avanga zirna in kharna, Niger state-ah chuan tun thla tawp atanga sikul kai chhunzawm leh tum a ni tih Nigerian thuneituten an sawi.
Karleh Thawhtanni atang hian ‘hmun himah’ chuan sorkar leh mi mal sikulte hawn phal a ni leh tawh dawn tih state education ministry chuan thu a chhuah a. Thutlukna hi venhim hna thawktu pawlte nena himna dinhmun thlir leh inrawnna neih hnua siam a ni tih an sawi.
November khan Nigeria khawthlang lam, Papiri-a St Mary’s Catholic sikul zirlai leh zirtirtu 250 chuang ruk bo an ni a, an rama a hlawma inruk bona lian ber pakhat a tling.
Thuneitute chuan zirlai leh zirtirtute hi Krismas hma deuh khan an vaiin chhanchhuah an ni tih an sawi a. Sorkarin a chhanchhuah dan hi engtin nge tih engmah puan a awm lo va, tlanna sum pea la chhuak nge an nih hriat a ni lo.
Kum tam tak chhung chu Nigeria hmun hrang hrangah mi sual pawl, bandit tia an sawite hian mi thah leh ruk bo an lo ching tawh a, tun hnaiah hmar lam ram lailiah a thleng tam zual.
Sikul leh inkhawmna hmunte chu an bitum nasa zual.
Sorkar chuang mi sual pawlte hi firfiakah a telh a, an hnena tlanna sum pek hi a khap bawk a; mahse, pek an ni reng tho nia sawi a ni.
Kum 2014-a Chibok-a hmeiuchhe sikul naupang 276 ruk bona lar tak a thlen atang khan sikul naupang 1,500 chuang ruk bo tawh an ni tawh.
Sikul hawn phal leh a nih hnuah hian eng sikulte nge tih a chiang lo va, education ministry chuan inhawng turte a la puang dawn a ni.
‘Hmun him tawk lova’ sikulte chu a him tawk tih hriat chian a nih hma chu an la inkhar dawn tih thuchhuahah hian tar lan a ni.
Ministry chuan zirlaite chu sikul kai leh theuh tura sawm nghalin sikulte pawh engzatin nge sikul kai leh an dinhmun chawlhkar khat chhunga hrilh turin an ti.
Hetianga thuneituten sikul hawn leh tum a nih thu an puan hma ni chiah hian Niger state-ah vek hian thingtlang khaw pakhat beih niin mi 30 vel thah leh thahnem tak ruk bo an awm tih police-in an sawi.
Inrinnia Kasuwan-Daji khua beitute hi silai nei, ramhnuai atanga chhuakte niin bazar an hal a, dawr an rawk bawk tih an sawi.
Mi chengte khalh khawmin an phuar a, chem nen an bei zui niin Niger State Emergency Management Agency hotu, Abdullahi Rofia chuan a sawi.
Zirlai ruk bo tamna Nigeria-ah sikul hawn leh tan tum
