Zirlaite ruihhlo duh loh kawng zawh

Zirlaite ruihhlo duh loh kawng zawh
Zirlaite Ni denchhenin Inrinni khan Aizawlah Mizo Zirlai Pawl huaihawtin zirlaiten ruihhlo duh loh lantirin kawng an zawh
Zirlaite Ni hi October 27 a ni a, Pathiannia a tlak avangin Inrinni khan he ni hi hman a ni. MZP Gen. Hqrs. bultumin school 23 atangin zirlai sang chuangin “Ruihhlo – Zirlaite Hmelma” tih thupuia hmangin school 23-a zirlaiten Millennium Centre atangin leh Sikulpuikawn atangin kawng an zawhin, Vana Pa Hall kawtah a tawpna siam a ni.
Hmanpuitu School Education minister Dr.Vanlalthlana chuan Mizoramin hmelma hrang hrang nei mah ila, kan hmelma lian ber zing ami chu ruihhlo hi a ni tih a sawi. “Tunhnaiah mipa kan thi nasa hle a, hei hian ruihhloin min luhchilh nasat zia a lantir. Ruihhlo hi middle school leh high school zirlaite a bulthut a nih avangin, inzirtirna kalpui tan a ngai tawh a. Sawrkar bakah kohhran pawhin tan kan lak nasat a ngai hle. School Education department chuan ruahmanna kan siam mek a, kan inbuatsaih nasa hle a ni,” a ti.
Hmanpuitu dang Excise & Narcotics minister Lalnghinglova Hmar chuan zirlaite tan ruihhlo chungchangah duhthlanna hman dik tanna Ni ni mawlh se a duh tih a sawi a. Vawikhat duhthlan sual a pawi a, vawikhat tihsual avangin kan nun pumpui a chhe vek thei tih a sawi. “Tumahin drugs ngawlvei kan duh hauh loang, chuvangin a tlai hma in inveng fimkhur ang u,” a ti.
MZP Gen. Hqrs. president H Lalthianghlima chuan Mizo zirlaite ruihhloin min tibuai nasa ta hle a, hei hi MZP chuan a vei a. Zirlaite Ni thupuiah ‘Ruihhlo Do’ a thlang ta tih a sawi. Ruihhlo that loh zia chu school uniform ha atanga inzirtirna kalpui a ngai tawh tih a sawi a ni.
Kum 2007 khan Mizoram sawrkar chuan MZP din champha October 27 chu Zirlaite Ni atan a puang a. He ni hi zirlaibu piahlamah zirlaite tana tangkai tur inzirtir ni leh hun atan hman thin a ni.
MZP hi 1935 October 27 khan Shillonga-a din a ni a. President hmasa ber chu R. Buchhawna a ni. Tunah hian MZP Gen. Hqrs hnuaiah Mizoram chhung leh pawnah headquarters 13, sub headquarters 51, branch 121 a awm a. Hnam pual zirlai pawl 7-in MZP an zawm bakah institution 25 nen a thawkho mek.