Zirlaiten kan kalkawng tur thlir ang – Education minister

Zirlaiten kan kalkawng tur thlir ang
– Education minister
Kumtina zirna zirchhuak tharte chu sawrkar leh company tan an hna tur siam mai sen a nih loh avangin zirlaiten mahni kalkawng tur thlira rilru nei rana lehkha zir a ngai tih School Education minister Dr Vanlalthlana chuan a sawi.
October 27 – Zirlaite Ni pualin School Education minister hian thuchah a siam a. Zirlaite chu kan ram hruaitu leh hna pawimawh chi hrang hranga a fawng la chelh tur an ni a, ram changkang apiangin zirna tha nei turin tan an la thin a, mipuitling chher chhuah tam an tum thin tih a sawi.
Hmun hrang hranga zirlaiten zirna tha an dawn theihnan sawrkarin tan a la zel a, zirtirtu indaih lohna phuhrukna atan primary, middle leh high school zirtirtu tur casual teacher thahnem tak lak an ni a, hmun kilkhawr zawka awmten an tangkaipui hle tih a sawi bawk.
Mizoram mai nilo, ram hrang hrangah thalai hnathawh tur nei lo chu buaipui tham an ni tawh tih minister hian sawiin, “Mizoramah hian kumtin graduate thar 3000 chuang awm zel anga chhut theih a ni a. Chutih laiin sawrkara hnaruak awm chu kum khatah za tam a ni thei lo. Kumtina zirlai chhuak tharte thawh tur hi sawrkar emaw company emaw tan siam mai sen a ni loa, zirlaiten mahni kalkawng tur thlira rilru nei takin zir ang u,” a ti.
Zirlaite chu All India level-a hna exam-ah leh zirna sang zawk zawmna atana entrance exam-ah tun aia lut tam theia inbuatsaih turin a fuih a. Zirlaite chu an zirlai tibuai thei ruihhlo laka inthiarfihlim tur leh HIV/AIDS laka himna’n mipat hmeichhiatna kawnga inthiarfihlim turin a chah.
“Ruihhlo ngai zinga a tam ber chuan kum 12 atanga 18 inkarah an ti tan a; high school leh higher secondary school an kal laiin nun an tikhaw lo hman a. Zoram tana inchher puitling ngei tura kan duhte kha chhawr hleihtheih lohin tam tak an awm mek a, a pawi hle a ni,” Dr Vanlalthlana hian a ti.
Mizo hnam nuna mawi em em, kan pipute atanga kan chhawm chhoh zel, aia upate zahna vawngnung zel tura chahin, “Kan hnam nunah aia upate hlutna leh pawimawhna a sang hle a, aia upate zah nachang hre thar ila, puipunnaah leh social media-ah pawh an bula sawi awm leh awm loh ngaihtuah thin ang u,” a ti.
Zirlaite inzir chhuah hun chu chhungkuain a nghakhlel a, ram leh hnam pawhin hriatna leh thiamna thar neih belh duhin a thlir reng tih minister hian a sawi. Zirlaite chu Mizoram timawi a, zirna kawng hrang hranga invawrh sang a, Mizo nihna mawi tak par vultir a, ram leh hnam tana taimak chhuah thar turin a sawm tih a sawi a ni.