Aizawl Smart City Limited (ASCL) hnuaia zirna in tih changtlunna tur project, Smart Classroom kaltlanga ngaihtuah hmanraw hrang hrang chu Thawhlehni khan Govt. Aizawl College, Mualpui Campus-ah deputy chief minister Tawnluia’n Aizawla zirna in hrang hrang tan a hlan.
Smart Classroom project hi School Education department hnuaia Aizawla zirna in 94 tan smart classroom 116 leh Higher & Technical Education department hnuaia zirna in 14 tan smart classroom 109, a vaiin zirna in 108 ah smart classroom 225 siam a ni dawn a. Interactive Board (interactive flat display panel) inches 75-a hlai, 3kVA power back up kengtel dah a ni dawn a. Heng bakah hian sawrkar primary school 121 hnenah computer, printer leh a kaihhnawih dang pek an ni dawn.
He project atana senso chu cheng vaibelchhe 7.43 a ni a. M/s Silicon Infotech Pvt. Ltd chu supplier niin kumin August 16 khan inremna siam a ni a, September 30 hi chuan Smart Classroom hmalakna hi peihfel vek tawh tura ruahman a ni.
UD&PA changtu ni bawk deputy chief minister chuan India rama khawpui 100 thlan chhuah tih hmasawnna tur project, National Smart Cities Mission chu kum 2015 a hawn a ni a, kum 2017 ah Aizawlah kalpui tan a ni tih a sawi a. Smart Cities Mission hnuaia hmalakna kalpui turin kum 2017 ah Aizawl Smart City Limited din a ni, tiin, hrileng avanga hun engemawchen hma lak a khaihlak hnuah theihtawp chhuah chhunzawm a ni a, tun dinhmuna project 40 chuang thawh a ni ta chu lawmawm a tih thu a sawi.
Smart Classroom project chuan thiamthil zir leh zirna tih hmasawn kawngah zirlaite leh zirtirtute nasa takin a pui thei dawn tih a sawi a. Infiamna kawngah pawh hma lak niin, ASCL kaltlangin hmun rukah astro turf phah hna kalpui mek ni tih a sawi bawk.
H&TE director Sangchhin Chinzah chuan information technology huna awm kan nih tawh avangin tunlai changkanna mil zela zirna kalpui thiam a ngai, tiin, zirtirtute chu intuaithar zel tur leh hmanraw dawnte hmangthiam tura theihtawp chhuah turin a chah.
Zirna puitu tur hmanrua hlan
