Zirtirtu nge lal Sawrkar?

Zirtirtu nge lal Sawrkar? tih zawhna hi pawl khat zirlaite pawhin an chhang dik thei vekin a rinawm.
Sawrkar chu a lal zawk a, sawrkar chu zirtirtu hna siamtu leh a diltute hna petu pawh a ni. Sawrkar chuan dan te pawh a zam a, dan zawm lo hrem theitu pawh sawrkar a ni a, zirtirtu hna atanga bantir theitu pawh sawrkar bawk a ni.
Pang Zirlai Pawl Gen. Hqrs. chuan Vathuampui leh a chhehvela zirna in hrang hrang an zirchianna atangin mi thenkhat, sawrkar thu zawm duh loa aikal la chhunzawm leh, aikal pawh la loa vawikhatmah an thawhna sikul la rap lo an awm tih an hriat thu an sawi a. Zirtirtu aikal la leh vawikhatmah sikul la rap lote chu kar khat chhunga an thawhna hmuna awm theuh turin a ngen a.
Zirlai pawl thuchhuah atang hian, engtia rei nge aikal an lo lak tawh a, engtia rei nge mahni thawhna hmunah an kal loh tawh? tih chhanna a lang lo a. Eng pawh ni se, hun rei lo te chhung chauh chu a nih hmel loh hle a ni.
Tuna sawrkarna chelh mek hian an sawrkar tantirh phat atanga an ngaih pawimawh hmasak zingah aikal lak tihtawp hi a tel a. Hma pawh a la nghal a, aikal la mi sang engemawzat an awm tih hriatchhuah niin, a tul ang angin action lak a ni a, a hnu lawkah aikal lak chu a reh deuh duak a, loh theih loh ‘case’ erawh an awm tho awm e. Hetiang thilah hian 100% hlawhtlinna hi chu thil theih loh tluk a ni a, mahse 99% te chu thil awm thei a ni.
Kum thum dawn a liam leh ta a, tunah aikal la leh, mahni thawhna tur sikul la rap miah lo an awm thu hriat a han ni leh ta mai hi, a chunga kan zawhna ‘zirtirtu nge lal sawrkar? tih hi zawhna pawimawh tak a nih hmel ta a ni. Zirtirtu chu lal zawk thu a awm lo; mahse, a duh ang anga a tal theih a, sawrkarin a chungah action a la bawk si lo a nih chuan, ‘a lal hle’ tihna a ni. Ama thuin a duh angin a awm a, hlawh lah chu a la reng awm bawk si a. Hlawh petute pawhin, ‘nang chu i thawk hlei nem’ tiin a hlawh tur an hreksak lo a ni chek ang a; chu baka lal chu a awm theih chuang dawn em ni? Thuneitu ni si lo, hnathawhnaah hna pawh thawk duh bawk si lo, thawh loh hlawh la reng an nih tho chuan, ‘an lal bêr bêr hle’ a ni mai lo’m ni?
Dan chunga leng tu mah an awm lo tih hi thudik tak a ni a; mahse, dan bawhchhetute hi chu ‘dan chunga leng’ chu an ni deuh ber awm asin. Chutiang chu sawrkar hian a en liam mai dawn tihna em ni ang?