Zirtirtu qualify chauh lak an ni tawh dawn: – Chief minister

Sawrkarin zirtirtu a lak zingah qualify lo, an qualify theihna atana hun pek ngai an awm thin tih chief minister Lalduhoma chuan a sawi a. Tun atang chuan a qualify chauh lak an ni tawh dawn tih a sawi. Mizo Students’ Union-in an kum 25 tlin, Silver Jubilee an lawm a hmanpuinaah chief minister chuan, HSLC result a chhuah hnu ah HSSLC result a chhuak leh a. An pass percentage-in hma a sawn a, sawrkar sikulten hma an sawn tih a lan thu sawiin, sikul tam tak chu PPP mode-a kalpui an tum a, kohhran sikulah bul tan an rilruk tih a sawi. Chumi rual chiah chuan sawrkar sikul thenkhat an chhunfin anga, an siamtha bawk dawn tih a sawi a ni.
“Zirtirtu qualify lote kum hnih vel hun kan pek hnuah a la qualify lo an chawl a, tun hnuah chuan a qualify chauh lak an ni tawh dawn. Advertisement chhuah loa hna lak hi India danpui kalh a ni a, kan hun atang hi chuan dan ang thlap zela hna lak kan tum,” a ti.
NGO-ten pressure group an nihna hre rana sawrkar nawr a, kawng zawh leh engemaw hmanga innawr mai duh chu awl thin mah se, engkim hi dawhkana sawifel theih an ni deuh zel a, sawiho hmasak zel a tha ber thin tih a sawi a. MSU pawhin chu rilru chu an pu nia sawiin, lawmthu a hrilh.
“NGO hian monitoring lamah min thawhpui tha ula kan duh a. Thil dik kan tihna kawngah in thawhpuina kan mamawh chang a awm thin,” a ti.
NGO ngah leh nei tha ber pawl kan nih laiin, pawl hruaituten pawl thiltum sirah mahni hamhaina an lo kalpui lutuk chuan thil fel lo a lo chhuak mai thin tih Lalduhoma hian a sawi a. Thil tum tha tak nei pawl an nih angin an thiltum tihlawhtling tura theihtawp chhuah zel turin a ngen tih a sawi.
“(Political) party leh party inkara thu inchuh a awm lai phei chuan NGO-ten ngawih an chuh thiam a tha fo. Kan tih tur leh kan tih loh tur hriat hi pawl zahawmna a ni,” a ti.
Zirlai pawlten hnam inpumkhatna kawnga an thawhhlawk thin chu an lawm hle tih chief minister hian a sawi a. Tunhnaiah Manipur-a Mizo nih duh ngai lo kan unau tam takin Mizo an nihna pawmin Mizo Integration Council an din tih a sawi. Mizo chhunga hnam peng hrang hrang tawng hmanga Mizo tawng thar tam tak a indin chho mek tih sawiin, “Chin Hills lamah pawh kan inunauna hi sawi tam a tul a. Mizote hi inpumkhat tura buatsaih mek kan ni,” a ti.
Hun rei tak atang tawhin MSU hruaituten sawrkarah zirlaite study tour budget tisang turin an ngen thin a. Kumin budget-ah sawrkar chuan a leta ti pungin cheng nuai 100 a dah a. Zirlai tam zawk study tour-in an chhuak thei tawh dawn tih a sawi a. MSU hruaituten MSU office hmun tur dapa sawrkara dilna an lo thlen tawh thin angin, sawrkarin Ainawn Veng lamah hmunhma tur a teh fel tawh tih a sawi bawk.
“Zirlaite zinga kan sawi fo thin, kan sawi nawn leh ngai thin chu, degree sang tak tak nei, national competitive exam paltlang thei si lo kan la tam lutuk hi a ni. Kan thalaiten tan in lak a tul hle a, inthlahdah loang u,” chief minister hian a ti.
Hmanpuitu dang, I&PR minister B Lalchhanzova pawhin, thalaite chu thil tha ti zel tura intichak tura chahin, Mizoram mipui kan pun chak theihnan puitling taka nung hma a, nupui pasal nei hma turin a chah. Ram tana hna a thawhna kawngah MSU chu thawhpuiah a sawm a ni.
MSU president B Lalkhawngaihzuala chuan, an ngaihpawimawh thil tha tam tak sawrkarin a tihsak avangin an lawm hle tih a sawi a. Zirtirtu qualify lo bantira an aiawh lak, advertisement tel loa zirtirtu lak bantira dan ang taka lak thar, HSLC leh HSSLC Exam result-a a titha indawt (rank) tarlan tawh loh, The Mizo Marriage and Inheritance of Property (Amendment) Act 2026 pass chu an lawm tih a sawi a ni.
Mizo Students’ Union hi kum 1981-ah R Vanlawma hoa din a lo ni tawh a. Ni mah se, mumal takin rei tak a kal lo. 2001 February-ah din thar leh niin registration pawimawh neihfel a ni a, vawiin thlengin mei mit loin a kal. A din kumah pawh 2001 zawk hi pawmin kuminah Silver Jubilee an lawm ta a ni. Silver Jubilee lawmna hi kumin February khan hawn a ni a, intihsiak leh programme hrang hrang buatsaihin, a kharnaah hian intihsiakna lawmman hi sem nghal a ni.
MSU hian Mizoram chhung leh pawnah branch (establishments) 110 a nei mek.