Zirtirtu qualify lote tun thla chhung sawrkarin hun pe
College leh insitution danga danin a phut ang thiamna nei kim lo asst. professor ho chu dan dik taka an thawh theihnan July thla chhung hun pek an ni a, hemi hnua an awm loh pawha an post hnawhkhah theih dan pawh ngaihtuah mek a ni tih Higher & Technical Education minister Dr Vanlalthlana chuan a sawi.
Thuthar thehdarhtute zawhna chhangin H&TE minister chuan, tunhnaiah college hrang hranga thawk part time assistant professor-te ban tura zirlai pawlin an nawr chungchangah, sawrkar hmasa lam huna lak an nih laiin, zirtirtu indaihlohna avangin, an qualify famkim lo chungin hriatthiamna nen lak an ni a, chutihrualin tling lo ngawih ngawiha lak luih erawh an ni lo tih a sawi. Sawrkar hmasa hunah an thawh hun chhung a zawh tawh hnu ah tum sarih chance pe in an thawh hun chhung pawhsei sak an lo ni tawh a, tuna sawrkar chuan chance vawi hnih a pe ve hman chauh a, chance pek a lo tam deuh tawh nen kawng zawh khum an ni ta tih a sawi.
Minister sawi danin, unqualified asst professor hi 29 an ni a, an zinga pahnih chu an thi tawh a, pakhatin NET a paltlang tawh bawk. Tuna qualify lo chunga thawk mek chu 26 an ni. Institution dang pahniha unqualified asst professor pathum dang nen sawrkar chuan show cause notice a pe tawh a, Govt Law College-a thawk qualify kim lo erawh intiamkamna awmsa, la kal mek a awm avangin, a tirah lam rik tel ni mah se, notice hi pek a ni ve rih ta lo a ni.
“Tun thla chhung chauh hun pek tur leh an ni a, hemi hnu hi chuan an awm loh pawha midangin an hmunruak an hnawhkhah theihnan file a kal mek a ni,” a ti.
Heng bakah hian an department hnuaiah zirtirtu qualify lo 129 an awm niin a sawi a. Zirtirtu indaihlohna a nasa lutuk a, tunah hian post ruak 3000 chuang a awm mek niin a sawi bawk.
Zirtirtu qualify lote tun thla chhung sawrkarin hun pe
