Zirtirtu thiam leh fit ngei kan la – Education minister

Zirtirtu hna lakah a thiam leh fit ngei an la thin tih School Education minister Lalchhandama Ralte chuan a sawi.
Zirtawpnia Vairengte-a Samagra Shiksha Higher Secondary School science stream building sak thar a hawnnaah School Education minister chuan, sawrkarin zirna tihhmasawn nan theihtawp a chhuah a, Serlui bialah pawh zirtirtu thahnem tak dah belh an ni tih a sawi. Zirtirtu hna lakah a thiam leh fit ngei lak thin an ni tih a sawi bawk.
“Tunlai khawvel hmasawn zelah science thiamna a pawimawh a, Vairengte khawtualah science zir theihna a awm ta hi a lawmawm a; building satu pawhin a sa tha a, sak zawh hun tura ruatah a sa zo thei a ni,” a ti.
Vairengte khaw mipuiin party thinlung dahthaa ramri buaia hma an lak thinnaah minister hian lawmthu a sawi a. Thu tisaa chantir thintu, kawngkapui vengtu, Zoram mipuiin an thlir thin an ni tih a sawi.
“Sum leh pai awm ang ang zirna atana hman hi sawrkarin a tum a, sawrkar hmalakna chin chu mipui pawhin thlawp ila,” Lalchhandama Ralte hian a ti a. Zirtirtute chu mipui tawiawm phu ni turin a sawm a, zirlaibu piahlamah zir tlak zirtirtu ni tur leh zah phu ni turin a chah bawk.
Vairengtea HSS science stream building sak thar hi chhawng 4 a ni a, a sakna atan Rs. 1,57,77,150.65 sen a ni.