State Referral Hospital – Zoram Medical College Falkawna Private Cabin Block sak thar chu Thawhlehni khan Health & Family Welfare minister Dr R Lalthangliana’n a hawng.
He building hi central sponsored scheme leh Special Central Assistance sum hmuh hmanga sak a ni a. Project-in a chhung cheina tur mamawh hrang hrang leina tur sum a ken tel loh avangin mimal inphalte sum thawhkhawm hmanga cabin hi cheibawl a ni. A thawhtu (donor) hi deputy CM Tawnlui, H&FW minister Dr R Lalthangliana, ZMC director Dr John Zohmingthanga, Zoen Electricals, Zamanthangi, Zamzo Engineering, Zochhuani Malhotra leh Lalthangliani w/o Dr T Selbuanga (L) te an ni.
Sum ruahman chu nuai 1153.35 a ni a, CSS (nuai 225.80) leh Special Central Assistance (nuai 927.73) atanga hmuh a ni. A sak phalna, administrative approval hi 2020 February 26-a hmuh a ni. 2020 July 15-a sak tan niin kumin March 20 khan a building sak zawh a ni a. Chhawng nga (Basement-II, Basement-I, Ground Floor, First Floor & Second Floor) awmin, a vaiin room 49 – VIP room 8, semi cabin 2 leh cabin 39 awm tura ruahman a ni. Heng room 49 zinga 20 chu mi inphal hming tarlan takte sum thawh tlingkhawm nuai 54 bakah PMJAY, ZMC leh RKS of SRH atanga sum (leh bungraw thenkhat) thawhkhawm hmangin peihfel a ni.
Minister chuan private hospital block a puiltin theihnan kawng hrang hranga hmalatute leh sum leh tha thawhtute hnenah lawmthu a sawi a. SRHF-ZMC thawktute chungah chuan lawmthu sawiin, Covid-19 len laia damlote enkawlna tur dedicated hospital-a hman a nih avanga an hah zia leh, chutiang an tawh hnu ah National Medical Commission endikna paltlang lehzel an ni tih a sawi.
ZMC-ah Cabin Block peihfel
