Health minister Dr R Lalthangliana sawi danin Zoram Medical College-ah khum 480 vel a awm a, Intensive Care Unit-ah khum 30 a awm bawk. Heng te hi hman theih thuai a ni dawn.
Zoram Medical College (ZMC) hi Inrinni khan Health minister hian a tlawh a. Hmasawnna thlirlet puiin, department hrang hrang leh building dinhmun a enfiah nghal. ZMC mamawh leh tihchangtlun zel dan tura department hotute meeting a neihpuinaah ZMC hotute chuan thawktu indaihlohna, building leh quarters cheithat ngai leh mamawh dang an thlente chu sum awm dan azira ngaihtuah zel an tum thu a hrilh.
Health minister sawi danin, ZMC-ah hian khum 480 vel a awm a, reiloteah hman theih vek a ni ang. ICU-ah khum 30 a awm a, ICU bula awm paying cabin (special ward) mi 50 vel len theihna chu hman theih thuai a ni dawn. Oxygen plant pathum awmin a siamchhuah theih zat chu – 200PSA, 300PSA, 1000PSA te an ni. Medical superintendent office sak chu luah a ni tawh a; he office chungah hian academic floor awmin, doctor ho exam conduct-na tur peihfel a ni tawh. Hemi chungah tho hian OPD floor khat peihfel a ni bawk.
ZMC Complex-ah hian VRDL laboratory leh MRI Research Centre din a ni a. MRI leh CT Scan khawl pawh hman a ni tawh. Tunah hian MBBS zirlai 485 an awm a, 2018 batch-in thla leh, April atangin internship an tan thei tura beisei a ni.
ZMC hnuaiah hian Health ministry leh ICMR atangin research project 10 vel kalpui mek a ni tih Health minister hian sawiin, ZMC hmasawnna hrang hrang hmuh tur awmah lawmthu a sawi a ni.
ZMC hotute chuan engkima ngaihsaktu chief minister leh Health minister bakah Health department-in an ngaihtuahnaah nasa taka hma an sawn thu leh an lawm thu an sawi a ni.
ZMC-ah khum 480 hman theih hnai
