Tunhnaia khuarel chhiatna thleng avanga Zoram Medical College (ZMC) hostel building him lo chu chak zawka hma lak tha a tih thu MLA Er. H. Lalzirliana chuan a sawi.
MLA hian August 5 khan Zoram Medical College (ZMC) academic building a tlawh a. MLA hlui pahnih Dr ZR Thiamsanga leh Prof F Lalnunmawia ten an tawiawm.
ZMC director Dr John Zohmingthanga kawmin Mizoram sawrkar hmalak tawhna leh a hlawhtlin mekna an sawi a. Sawrkar hmasain ICU, NICU & PICU, Oxygen Plant, OT changtlung tak a buatsaih te, cardiology unit din tura hmalakna, PG zirna tur leh Mizo cardiac surgeon tan post siam tura tih a nih bakah infrastructure tha zawk nei tura hmalakna chu tha taka bawhzui zel an beisei tih an sawi.
Khuarel chhiatna avanga girls hostel building thlang leimin chu a hmunah tlawhin, zirlai 120 awm theihna ZMC Girls Hostel hi kumin May 25 atang khan luah ngam lohin an chhuahsan a, tunah hian thenkhat chu an lut leh tawh a. Boys Hostel pawh dinhmun hlauhawmah a awm mek tih sawi a ni.
Helai hmun hi DM&R department leh central team lam pawhin ngaihven tawh mah se, hmalakna a chak tawk lo nia an ngaih thu MLA Er. H. Lalzirliana hian a sawi a. ZPM MLA leh minister-te pawhin a hmunah tlawh se a duh tih a sawi.
ZMC atanga MBBS batch hmasa bera zir chhuakte hian internship tizoin, 65 zingah mi 30 velin NHM hnuaiah hna an hmu nghal a. PG zir tumin engemawzatin coaching an kal a; pakhat chu PG Surgery zir turin AIIMS-ah inziaktlingin, a zawm tawh nia sawi a ni.
ZMC hostel a him loah ngai
