Zo Inspiration Foundation-in an puihte nen intawhkhawm siam

Zo Inspiration Foundation-in an
puihte nen intawhkhawm siam
Mi harsa leh tanpui ngaite tanpui kawnga hma latu Zo Inspiration Foundation chuan an tanpuite nena intawhkhawm hmasa ber chu Zirtawpni khan Aizawlah an buatsaih a, chief minister Lalduhoma’n a telpui.
Zo Inspiration hi 2020 March vel atang khan Emmanuel Thangrosanga’n youtube channel hmangin bul a tan a. Foundation din tan ni atan 2020 June 7 hman a ni. 2020 June 22 atangin Samtlang quarry chim vanga nunna chan Lalhruaizela kalsan tak a chhungte chhawmdawlna thilpek, mi inphalte kaltlangin a dawng a. Hei hi mi harsa leh tanpui ngaite tanpuina lama bul a tanna a ni.
Emmanuel Thangrosanga hian a hnathawh mek, zirtirtu hna bansanin helama hmalakna hi hun pumin a kalpui ta a. Tun thlengin vehbur tum 85 an khawn tawh a, chuta tanga thilpek tlingkhawm chu cheng nuai 300 chuang a ni. Heng sum hmang hian chenna in thar emaw cheithat 18 an nei tawh a, mi harsate eizawnna tur eichawp dawr pathum an pe tawh. Zirlai naupang sponsor 26 an nei mek. Heng bakah hian thilpek tam tak an sem chhuak tawh bawk.
Zo Inspiration Foundation rawngbawlna video chiang zawkin a en a, a te chem chemin a inhria tih chief minister hian a sawi a. An hnathawh ropui tak chuan a tichak tih a sawi.
Sawrkar dan hnuaia foundation tha taka a chang ta chu lawmawm a tih thu sawiin, thui lehzual kal turin mi inphalte thawhlawmah chauh innghat loin, CSR (corporate social responsibility) thlengin an dap ve thei tawh dawn tih a sawi bawk.
Mi inphalte chhunluh Chief Minister Relief Fund (CMRF) tlingkhawm atangin an pe chhuak ve reng a. An dawn nasat ang bawkin an pe chhuak reng bawk, tiin, “CMRF ai maha nasain nangni’n hma in lo laa, thawhho theihna tam tak kan neih a rinawm,” a ti.
Mihringin kan pianhma amite rawng kan bawlsak thei loa, kan thih hnua lo awm zelte rawng pawh taksa in kan bawl thei lo tih Lalduhoma hian a sawi. “Kan damrualpuite rawng chauh hi kan bawl thei a. Kam damrualpuite rawngbawlsak hna hi hna ropui ber chu a ni. He foundation pawh hian chu hna chu in thawk a, nangmahni kaltlanga thilpek petute pawhin chu hna chu an thawk a ni,” a ti.
Zo Inspiration Foundation hian kumin March 15 khan society registration an nei a, mumal leh felfai takin an inenkawl a, office hi Ramhlun Venglaiah neiin thawktu 8 an awm.