Zofate leh Meitei kar a lum leh

Tunlaiin Manipur a lum mep mep khawp mai a, sap tawng media lam pawh an luah hle. Meitei boruak a lum a, he state-a Zofate leh Meitei kar a lum bawk.
Hun engemaw chen an boruak sa hut hut a reh a, tun hnaiah Zofate leh Meitei te an inkap leh. A lehlam lehlam hi an insang mar tha leh tia sawi theih a ni.
Kar hmasa atang khan Meitei lam hi an sosang a, Imphal-ah phei chuan Meitei hi an buai hut hut a ni ber. Manipur chief minister-in larsap a hmu a, hei hi lungawi lohnain a zui. Meitei zirlaite’n lungawi lohna an lantir a, hliam tuar, damdawi ina hruai ngai pawh an awm.
“Meitei hian thil hriat ruk an nei nge, eng nge a chhan pawh kan hre lo a, kar hmasa Nilaini vel atang khan an sosang a, an sosang em em mai a ni,” Zofate hruaitu pakhat chuan a ti.
“Eng nge an buaipui chiah kan hre lo a, a awmzia hi kan hre bik lo. Thil ngiat eng emaw tak an nei a ni ang, lungawi lohna te an lantir a, Meitei zirlai an lungawi lo a. Meitei lam hian thil hriat ruk an nei em ni aw kan ti a, chumi chu sual chhuah an tum a ni ang te kan ti a,” a ti bawk.
Imphal-a an sosang hian hmun dang pawh a nghawng tih a sawi a, tun hnaiah silai a puak leh a, an boruak a lum leh tih te a sawi.
Hetia Meitei an sosan hnu hian hmun hrang hrangah silai a puak leh a, silai hmeh puah hi chu a awm deuh reng a, mahse nasa taka inkah chu hmun hnih khatah bak a awm rih lo tih te Zofate lam chuan an sawi.
An sawi danin, kar hmasa Zirtawpni khan Jiribam-ah Zofate leh Meitei hi an inkap a, Meitei pathumin nunna an chan. An chumi inkap zo chu Meitei lamin Zofate hi kawngah an lo lambun a, mi paliin nunna an chan.
Mi palite ruang hian Thawhtanni khan Lamka a thleng a, Martar thlanmual-a phum an tum. Chutianga an buai lai chuan ramhnuaiah Zofa pahnih, tun hnaia Meitei-in an hruai bote ruang chhar a ni a, an boruak hi a dai lo.
Manipur atanga thu dawn danin, mi pahnihte hi Meitei-in an man a, Zofa lamina an zawn mekte an ni. Kangpokpi lam mi an ni.
Kar hmasa Zirtawpni khan Moirang-ah Zofate leh Meitei te hi an inkap bawk a, laipui muin in pakhat a deng. Moirang hi Lamka atanga a hlat loh avangin Lamka lam pawh a inralring leh deuh tih thu dawn a ni.
Hun engemaw chen an inkah loh chhung khan a lehlam lehlam hi inring rengin an awm a, Zofate pawh mahni khua vengin an duty chhunzawm reng. ‘Frontline’ an ti a, a hmatawnga duty-te phei chu ngawrh takin an duty reng tho. Tun hnaiah an boruak a tang leh deuh a, ngawrh lehzuala duty dan tur pawh an ngaihtuah tih thu dawn a ni.