Zoram Thar kum 10 tlin lawm

Zoram Thar kum 10 tlin lawm
Zoram Thar Zofate Lairelna Inpui chuan Inrinni khan Aizawlah Zoram Thar kum 10 tlin an lawm a. Zoram Thar hruaitu Rev Dr Zaichhawna Hlawndo chuan kum 10 chhung rawngbawlna report pe in, Zoram Thar hmathlir a sawi.
Zoram Thar hruaitu chuan kan ram politics, kohhran, hnamah leh eizawnna zawng zawngah Pathian lal ram Lalpa’n din a tum, tiin, Lal Isua a lal ber hunah kan ram a dam dawn tih a sawi a. Chu chu a hlawhtlinna atan chhiahhlawh hna an thawh zel tur thu a sawi a ni.
He hunah hian Lalpa tana huaisen taka 2018 leh 2023 inthlanpuiah Lalpa tan bawm hung (MLA candidate) tawh mi 30 hnenah chawimawina thilpek hlan an ni.
Zofate Pathian biak inpui sak hnatlang chhunzawm mek a ni tih pawh Rev Dr Zaichhawna Hlawndo hian a sawi a. Thenzawl Kanan Phaipuiah leirawhchan siam mek niin, a duh apiang tan hnatlan theih a ni a, kumin March-ah chuan a ban phun tan ngei a nih theihnan ‘Hnam Biakinpui’ hi Zofate inpumkhata Chanchintha kan hrilna atan Zofate zawng zawng thawkchhuak turin a sawm tih a sawi a ni.