Zo Re-Unification Organisation (ZORO) chuan India leh Myanmar ram zalen taka inkalpawh theihna – Free Movement Regime (FMR) India sawrkarin a hlih tak duhlohna leh tinung leh tura a phutna lantirin January 29 hian hemi chungchanga India sawrkar hriattirna leh a bawhzuina lama Mizoram sawrkar hriattirna lehkha copy chu an hal dawn.
ZORO Thalai Hqrs. hruaitute sawi danin, karleh Nilaini hian Mizoram khaw hrang hrangah India sawrkar in FMR a thiah leh In dia-Myanmar ramri hung a tum duhloh lantirna hi hman an tum tih an sawi a. Aizawl bakah district dang thenkhat, ZORO leh a thawhpuite dinnaah pawh he hun hi hman tum a ni tih an sawi.
ZORO chuan India sawrkarin Free Movement Regime thiat a, ramri hung a tum hi a tawp thlengin a dodal zel dawn tih sawiin, UN Declaration on the Rights of Indigenous Peoples 2007 Article 36(1) ah “Tualto hnamte, a bikin khawvel sawrkar ramri khamin a thendarhte chu an inkalpawhin an intanpui anga, sakhaw thil leh khawtlang thil, ei leh bar leh politics-ah anmahni mi leh sate nen inpawh a, sawiho theihna dikna chanvo an nei a ni,” tih a nih bakah “Ram roreltute chuan tualto hnamte nen inberawnin, he dikna chanvo hi tipuitling turin hma an la ang,” tih a ni a. He dan pass a nih lai hian India chuan a duh lamah vote a pe a, tunah erawh a kalh zawngin hma a la mek tih an sawi a ni.
Aizawla punkhawm turah hian political party hrang hrang aiawh pawh thu sawi turin an sawm tih ZORO Thalai hruaitute hian an sawi a ni.
ZORO-in FMR hlih duhlohna lantir dawn
