Mipuiin ZPM ‘enchhin’ an duh a, an enchhin hma chu an rilru a dam dawn loa, sawrkar tha an siam chuan an ni sawrkar nen a inang reng tih Congress president Lalsawta chuan a sawi.
MPCC chuan Zirtawpni, December 15 khan Congress Bhavan kharna inkhawm an hmang a, an party atanga kumin MLA inthlanpuia tling awmchhun C Ngunlianchunga lawmpuina an hmang bawk.
Ram leh hnam tana thawktu Pu C Ngunlianchunga an nei hi Congress an vannei em em a. Awmhmun atanga ram leh hnam tana rawng bawl thin, driver atanga bul tana MLA thlenga chho thei a ni tih Lalsawta chuan a sawi. Inthlan kalta khan beiseina sang tak nei ve mah se, an beisei ang an ni pha ta lo tih sawiin, “Mipuiin ZPM ‘enchhin’ an duh a, an enchhin hma chu an rilru a dam dawn lo. Thinlung takin ka lawmpui a, sawrkar tha an siam chuan kan sawrkar nen a inang reng a ni. An tan tawngtai ang u,” a ti.
Congress party chu beidawnga thu mai mai thiang an ni loa, an tlakna sang mah se an bei zel dawn a, an tho leh dawn tih a sawi. “Miin min duh rih lo mah se, min duh turin kan insiamtha anga, kan hmaah beiseina eng a awm a, chu chu kan zui zel dawn,” a ti.
MLA C Ngunlianchunga chuan a politic zinkawng leh hlawhtlinna a sawi a. “Politic-ah hian seat vawikhat mah ka la dil ngai loa, ka din tawh chuan tumahin min chuhpui ngai lo bawk. MDC ka nih dawn pawhin ka khawlai leng min sawm a ni” a ti. Village council member-a tanin MLA ni a minister hial a nih chhoh dan a sawi. “Lawngtlai West bialah MDC bial 11 a awm a, tun tum inthlanah hian MDC pakhat pawh kan nei lo. Pathian’in min hruai a, hnehna min chantir hi ka lawm em em a ni,” a ti.
MLA thar hi Mahila Congress leh NSUI pawhin lawmpuina thuziak an hlan a ni.
ZPM an enchhin hma chu mipui rilru dam dawn lo – Lalsawta
