ZPM hruaitute an intuaithar
Sawrkar lai Zoram People’s Movement party-a MLA rual leh party hruaitu lawk chin chu January 16 khan Aizawlah thlarau lama intuaitharna hun an hmang a. Evangelist speaker Frederick Lalrindika kaihhruai Bethel ministry-in hun an hmanpui.
Chhunah leh zanah thupui hrang hrang hmanga thu ngaihthlak a nih bakah zaia inpawlhona hun an hmang a. ZPM Gen. Hqrs. thuchhuah danin, ZPM-in huaisen takin ‘Ram Rorelnaa Pathian Ram Tundin’ tih an aupui a, an Danbu-ah pawh a hmasa lamah an ziak lang a. Mizoramah ram rorelna kawngah a tha zawnga kaihruai turin ‘Kristian Nundan tha’ aia tha zawk a awm loa, chumi kawnga inhlantharna leh intuaitharna chu ram roreltute tih fo tur a ni tih a sawi.
Sawrkarna fawng chelhtu ZPM hian an kawng zawh zel tur atan hetianga inbuatsaihna hi nei an ni, tiin, ‘Party leh ministry hruaitute hi tlinlohna nei, tih dik tawk loh nei leh thiam tawk loh nei thei vek an ni. Pathian hnena inhlantharna leh intuaitharna hi sawrkarna an chan lai ngeia neih fo an duh a, a taka an ti thei hi mipui tan pawh hriat a nuam hle awm e,’ a ti.
Retreat hi chief minister chuan a ngaipawimawh a; a kal turte pawh rokhawlhna liantham tak an nei a nih loh chuan kim taka tel tur leh, hun pawh dik tak leh uluk taka vawng vek turin a chah nghe nghe tih ZPM thuchhuah hian sawiin, ‘Sawrkarna chang mek ZPM hruaituten an sawrkar lai ngeia Pathian mihmante kaihhruaia hetiang hun an huaihawt hi a lawmawm a. An hun hman pawhin rahtha a chhuah ngei beisei ila, kohhran leh mipui pawhin nasa lehzuala kan tawngtaipui a tul hle,’ a ti.
He hunah hian ZPM Gen. Hqrs elected OB, consultant, PAC member, adviser, general secretary leh MLA chin an tel tih a sawi a. Chief minister Pu Lalduhoma pawhin thutawi sawiin, “Chakna ni loin, thiltihtheihna ni loin, ka thlarau zawkin le, tih hi kan innghahna tur a ni reng a ni,” tih a sawi thu a tarlang bawk.
ZPM hruaitute an intuaithar
