Tunhnaiah ZPM party hruaitute chuan sawrkar hnathawkte chungah dan an palzut a, sawrkar thuneihna dik lo takin an hmang tih Congress Thalai chuan an sawi.
Congress Thalai Hqrs. thuchhuak chuan, ZPM Media, IT & Publicity Department thuchhuah danin ZPM president Pu Lalliansawta leh a team-te chuan 2024 April 16 khan Tuirial West Block huamchhung khaw thenkhat an tlawh a, West Block ZPM OB ten tukthuan kilpuiin, president hian 1st IR Bn Headquarters Mualvum a tlawh a, Govt Middle School kawng endikin, Mualvuma Field No.II leh hospital a endik thu te, ramri post duty chungchangte police hotute a sawipui bakah MP inthlan tura ZPM candidate Pu Richard Vanlalhmangaiha duhsak taka lo vote tling ngei turin a sawm thute tarlan a ni tih a sawi.
ZPM Southern Hqrs. Lunglei president Pu C Lalhmingliana pawhin May 7 khan Lungleia sawrkar department hrang hrang hotute chu an department changtu tura ZPM Southern Hqrs Lungleiin a ruatte harsatna siamsak loa theihtawp lo chhuahpui turin a ngen tih Lunglei JB Zonet news-ah tarlan a ni tih a sawi bawk.
‘Hetiang hian civil mi, mipui thlan pawh ni loten sawrkar thuneihna dik lo taka hmangsualin dan an palzut bawrh bawrh a. India ram sawisa mektu BJP chet dan ang chiahin an duh an tih theihna tur kawngah chuan ram mipui dikna leh zahawmna chu engahmah ngai loin an rapbet zel hian Mizoram tan ZPM rorelna him loh zia chiang takin a lantirah kan ngai a ni,’ a ti.
ZPM hruaituten dan an palzut – Congress Thalai
