State-a sawrkar lai ZPM party chuan member of Parliament Rajya Sabha candidate atana an vawrhchhuah tur an puang a, an party Political Affairs Committee member leh party thupuangtu ni bawk K Laltluangkima an ruat.ZPM hian Nilaini khan an party office-ah Rajya Sabha MP candidate tur hi an puang a. A puangtu ZPM vice president C Lalnunnema chuan, June 2 zan khan ZPM Rajya Sabha MP Nomination Committee hi chief minister bangla-ah an thu a. Candidate tur mi tha tam tak an nei a, mi tha an tam chuan ngaihtuah pawh a harsaa rin a nih laiin, harsatna nei loin tluang takin an thlang tih a sawi.
ZPM Rajya Sabha MP candidate atana ruat K Laltluangkima chuan, MP candidate tur zawn intham chhungin ngawih a chuh a, mahni insawi arhna lam emaw midang khenna lam emaw engmah a chhuah lo tih sawiin, chu chu an hotute pawhin an lo chhinchhiah a ni em aw a tih thu a sawi. An party atanga midang awm deuh lang ho chu amah aia fel hlir an ni tih a sawi.
“Kei aia fel tak tak hlir an awm laia kei min thlang hi a mak ka ti a. Kan hotute hian an thlan lohte pawh hi an duhsak em em a, ka chungah rinna an nghat hi ka lawm,” a ti.
K Laltluangkima hi thiamna lamah B.Com a ni a. Trinity & All Saint College Leeds atangin Christian Communication Studies a zo bawk. Politic lamah kum 1997-ah MNF (N), a hnua ZNP party ni ta a zawm a. Kohhran puina thenkhatin political party thenkhat thlawpa an din Citizens Common Front kaihhruaiin kum 1998 MLA inthlanah Bilkhawthlir bialah candidate a ni lo ni tawh.
Election Commission of India chuan June 1 khan Mizoram Rajya Sabha MP thlanna tur ‘official notification’ a tichhuak a. Nomination hi June 8 thleng ‘file’ theih a ni. June 18 zing dar 9 leh tlai dar 4 inkarah vote thlak a ni anga, June 18 tlai dar 5-ah vote chhiar nghal a ni ang. July 19-ah Rajya Sabha MP nilai hun hi a tawp dawn a ni.
Rajya Sabha member hi state tina MLA-ten an thlang thin a, a ruata ruat an awm thin bawk. MLA-ten an thlan a nih avangin state-a sawrkar lai candidate chana dah deuh a ni. ZPM official candidate hian vawiin, June 4 hian nomination ‘file’ a tum a. Party dangin an candidate tur an la puang lo thung.
ZPM-in RS MP candidate puang
