ZPM leh Congress chu MP atana an party candidate cancel a, Mizoram tan amah vote zawk turin a sawm tih BJP MP candidate Vanlalhmuaka chuan a sawi.
Nilainia Kolasib-a thuthar thehdarhtute nen an inkawmnaah Congress party-in inthlan dawn apianga Hindu nena BJP sawizawm a, thu thehdarh reng thin an ni tih BJP Mizoram president hian a sawi a. Mizoram BJP chuan sum duh vangin Vai pathian hmaah chal hnawihsen leh coconut sawhkeh an ti ve ngai dawn loa, Congress chief minister Pu Lalthanhawla chuan sum duh vangin Vai pathian ban sawm nei hmaah chal hnawihsenin, coconut a sawh keh tih a sawi.
“Inthlan dawn apianga dawt hmanga BJP min beihna bansan tur leh, Zoram mipui pawh politics tuinua inchiah tawh loa, thudik leh rintlak chauh ngaithlaa zawm turin ka ngen a ni. ZPM leh Congress hian an party MP candidate hi cancel se, central blessing dawng mai niloa, pechhuak thei dinhmuna ding tur, minister dinhmun hial ni thei tur ka nih avangin Mizoram tan min vote vek zawk turin ka sawm a ni,” a ti.
Hmarchhak state 8 zinga State president awmchhun, Kristian MP candidate zinga Lok Sabha-a ding awmchhun a ni tih Vanlalhmuaka hian sawiin, MP-a a tling a nih chuan central hotuten central minister ni thei turin ‘green signal’ an pe tawh a, BJP MP candidate tih tlin chu Mizoram tan central minister nih theihna awmchhun a nih tur thu a sawi.
“Central minister-ah Dr C Silvera kan nei tawh a, central minister a nih avang hian Mizoramin hmasawnna kan nei nasa hle. Heng zawng zawng ngaihtuah hian Mizorama MP candidate-ah chuan central-a minister ni thei awmchhun ka ni,” tiin mahni awmna party dahthaa vote turin mipui a dil tih a sawi a ni.
ZPM leh Congress ten min vote vek zawk turin ka sawm che u – BJP candidate
