Rajya Sabha member of Parliament candidate K Laltluangkima chuan Assembly Secretariat-a commissioner & secretary, Mizoram Rajya Sabha MP election returning officer Zothansanga Ralte chuan Zirtawpni chawhnu khan nomination paper a thehlut.
June 18-a Mizoram Member of Legislative Assembly-ten an thlan tur Mizoram aiawh Rajya Sabha MP atan hian ZPM candidate chauh hian nomination a la tifel a. June 3 khan ZPM office-ah ZPM vice president C Lalnunnema’n an party aiawha Rajya Sabha inthlana ding tur hi a puang a ni.
ZPM candidate ‘nomination file’ ta K Laltluangkima ‘seconder’ hi ZPM vice president C Lalnunnema a ni a, MLA pali – Prof. Lalnilawma, TBC Lalvenchhunga, H Ginzalala leh T Lalhlimpuia te chu ‘proposer’ an ni.
Mizoram Rajya Sabha Member of Parliament thlan tur hi Election Commission of India chuan kumin June 1 khan official notification a tichhuak a. Nomination tih theih hun hnuhnung hi June 8 chawhnu dar 3 thleng a ni a, June 9-ah nomination paper endik a ni ang. June 11 thleng inhnuhdawh theih a ni. June 18 zing dar 9 atanga tlai dar 4 thleng MLA-ten vote an thlak anga, tlai dar 5-ah vote chhiar a ni ang.
June 18 hian Mizoram bakah India rama state 10 – Andhra Pradesh, Arunachal Pradesh, Gujarat, Jharkhand, Karnataka, Madhya Pradesh, Manipur, Meghalaya leh Rajasthan ten Rajya Sabha MP hi an thlang ve dawn a ni.
Hetihlai hian opposition party zinga Rajya Sabha candidate neih tum awmchhun nia la hriat MNF chuan Zirtawpni khan an candidate tur hi puan hman an tum naa, an thulh leh thut.
Candidate puan tumah hian Zirtawpnia Hnam Run inkhawmah party senior vice president Dr R Lalthangliana’n puang tur anga sawi a ni a, hemi ngaihven hian thuthar thehdarhtu lam pawh an kal. Inkhawm tawp dawn lamah candidate tur an la puan rih loh tur thu hi sawi a ni a, an la puan loh chhan sawi a ni lo. Hetihrual hian ‘thang kam’ an la nei niin thu dawn a ni a, karleh Thawhtanni-a puan hman an tum tih an sawi.
ZPM MP candidate-in nomination file MNF-in candidate tur la puang thei lo
