Rosangzela, Vh
Ph: 8974138026
Kumin kan inthlang tur chu a chichawmin a ngaihnawm khawp mai, zawlnei in-candidate tur kan neih laiin a zawl rawngkai thovin vote thlak te chu an thlakna hmunah an nunna a tawp ang a ti hmiah bawk a. London atanga Pathian Lalram dintur an lo haw vang vang bawk a, bathroom sil laia Pathian aw hriaa nomination file zui ta an awm bawk a. Heng zawng zawng ngaihtuah hian, ram hruaitu thlan hi kan la na hle tih hi a ni.
Bible kan keu chuan Genesis bung 37 atangin Josefa chanchin kan hmu a, Josefa chanchin hi sermon thlaktute hian an hmang rim khawp mai, a chhan ni awma lang chu, sex-ah a tlu lo kha a ni. Josefa hian thil ropui tak a tih aiin a tih duh loh hian a chanchin a ti mawi zual a, Potiphara nupuiin vawi tam a thlem a, chuti chung pawhin a dai pelh lo a ni. A tih duh loh hi tunlai chhuante entawn atan thuhriltuten an sawi chamchi a ni, Nehemia chungchang hi kan tuipui viau bawk a. Zoram dinthar lehna lam sawi a nih chuan Nehemia hi a thlauh thlak theih loh, ‘I dinthar leh ang u’ kan tih tawh chuan Nehemia a lo lang nghal chat thin. Nehemia thahnemngaihna chuan Israel fate thinlung chawk thovin, kut leh lamah ralthuam kengin kut leh lamin hna an thawk a, Jerusalem kulh chim tawh leh a kawngkhar ut rem rum te chu hun reilote chhungin an dinthar leh a ni. Nehemia testimony ropui tak kan hriat fo chu, Pathian a tih avangin a hmaa roreltute angin a hautak ve lova, a duham hek lo. Nehemia ropuina em em chu “ka ti ve lo” a tih hi a ni.
Kan ram hian kum tamtak chhung roreltu duham leh hautak tak te a lo hrawn tawh a, mirethei lu chunga vaivut tak ngial pawh it khawp a koham MLA tamtak a lo chawisang tawh a. Mipui zahna reng reng nei lo ram hruaitu, vana arsi zat zet BPL-a mipui chhuahtute thuhnuaiah ram hi hun rei tak a lo kun tawh a, tisa thlarauva mipui sawp zawitute zarah State azawnga rethei ber kan lo ni ta a ni. Miin kan ram kalphung hi zan mumangah nei se, a mumang chu mangchhia a ni ang, miin mangchhia a mang a nih chuan a khumlaizawlah a rum chhuak thin. Roreltute zar zo ve pha lote mangchhia chu mi tin hriat theih khawpin a lo rum chhuak ta a, chutiang taka ram mipui rum ri chuan Politics-a mutthlu mithate a kaitho ta a, Politics-ah thlir dan thar leh harh tharna a lo thleng ta a ni. Harh thar te chu tute nge? ZPM em ni? Ni lo, veng tin leh khaw tina Party ruih chilh lo, chhia leh tha thiang taka hmanga vote thlak duhtute hi an ni. Hetianga harh tharte huikhawm tura ‘FIT’ inti chu ZPM hi an ni, hnehna chan theihnan a “KA TI VE LOVANG” tih au chhuahpuitute a ni.
Roreltu hmasa te hlawkpui ang, thawklehkhata hausak thutna leh hleih neia rorelna ang chi reng reng chu kan ti ve lovang titu ZPM hi an inngaihtuah chiang em? Mipui rilru hneh nan ‘kan ti ve lovang’ an ti mai em? Tunah hian ZPM hi an tlang a sang hle tawh a, phih thlak hleih theih loh dinhmuna dingah an inngai mek a ni. Mipuiin beiseina neiin, an tih ve dawn loh chuan kan chawikang mai tur a ni tiin kan insawrbing mek a ni. Ralmuanna tlangah sawi mai awl mahse tih ang deuhin, tunah chuan tih ve loh tur chu sawi a la awl khawp mai. Mahse, thuneihna an chelh a nih ngai chuan ZPM a mi riltamte an hmachhawn dawn a ni, Party worker te lakah kan ti ve lovang an tih hi a tak ram a thleng zo emaw chu? Chuvangin, he Political Party thangduang tak hian phurrit (burden ) a insiam a ni. Tun diunhmunah kan Political Party palian pahnih INC leh MNF-ah mipui bawidawnna a awm, beidawnna ata hruai chhuak turin ZPM-ah beiseina nung neih mek a ni. Mipui hian kum 5 chhung beidawng leh khawro taka kal hi kan peih tawh lo, chuvangin tuna mipuiin kan nin em em ramhlui zia hi nuai bo turin ZPM kan beisei. Mahse tih hi awm tlat, ZPM hian kan ti ve lovang an tih hulh hulh hi an ti leh si a nih chuan kan ram chu thim thuah sarih aia thimah kan lut dawn a ni. ZPM hian phurrit tak an phur a ni.
Thil tha lo tih loh chu phurrit a ni em? Thil tha lo kalsana thil tha tih hi thlarau lam nunah pawh a harsa lai chu a ni. Piangtharin a tih ve rem tawh lo hi a hlawk leh nuam hlir a nih avangin, kan tlu leh phuk phuk thin a nih hi. ZPM hi Kutfai rual awmkhawm an nih kan beisei, Party worker ten tunhmaa mite angin an pute lakah beisei an nei thiang tawh lo. ZPM MLA te chu mahni duh ang anga tal a rem dawn lova, Super CM hnuaiah mai ni lovin VUC hnuaiah an awm tih an hriatreng a tul dawn a ni. Chhungkhat laina uchuak taka duhsak te, thiantha duhsakna uchuak taka lantir te chu a rem tawh dawn lo “nepotism” in nunna a nei tur a ni lo. Engkim mai hi dik tak leh fel takin an kalpui tur a ni, sawi tur a va tam em !!. Heng zawng zawng han ngaihtuah hian ZPM hian tih loh tur a va ngahin a va rit dawn. ZPM manifesto hian sawi a hlawhin chiptu pawh a ngah hle, chuvangin an lo sawrkar a nih chuan um zui hlawh em em tur manifesto a ni tih an hriat a tul khawp ang. Ram mipuiin an chakna (Potential) kan la hriat loh Party an nih avangin beiseina sang tak nen kan thlir a ni. Manifesto hi chu ruahmanna fel tak neia duan thin a ni a, sawrkar tan chuan a hlawhtlinna kawng zawhpui hi a har teh chiam lo. Mahse, kan sawi tak angin a har lai chu “tih ve loh “ hi a ni, ZPM an sawrkar chuan a thawk aphita ‘restricted tender’ tih fo te hi a reh tawh dawn a nih chu. Ka ti ve lovang tih hi nuai thum sem ang chauh a nih chuan ZPM hian mipui mai ni lovin Pathian ngaihah pawh sual lian tak an puitlin a ni ang.