ZPM president Lalliansawta’n taksa lamah harsatna a tawh avangin mi dang kutah president ‘charge’ a hlan a, chief minister Lalduhoma hnenah a hlan.
President hian April ni 21-ah charge hi a hlan a, president nghet ni tura inhlan chhawng ni lo mah se chief minister ni laiin president nihna a chelh rih dawn tihna a nih avangin politics-ah thawm a nei.
ZPM hian chief minister leh party president nih kawp theih loh tih dan an nei a, an dan bu-ah chuan, “Chief minister leh party president nihna hi mi pakhatin a chelh kawp tur a ni lo. Minister leh party elected OB nihnate pawh chelh kawp theih a ni lo ang,” tih a ni.
Chief minister hian eptu lama an awm lai khan an sorkar a nih chuan chief minister nihna leh party president nihna an chelh kawp ve dawn lo tih a sawi thin a, chief ministerial candidate atana an puan tawh hnu, 2023 July thla tawp lama East Tuipui bial khaw hrang hrang a fannaah pawh “ZPM chuan party dangte tih dan ang ni lovin ccollective leadership kan kalpui a, chief minister leh party president nih kawp a rem ve lo a ni,” tiin a sawi. A hma lawk July ni 15, 2023-ah pawh Aizawl East II ZPM te’n Armed Veng South Community Hall-a mi thar an lawmluh thumin, “Party president leh CM nihna hi mi pakhatin a chelh kawp dawn lo,” tiin a sawi. Mi dang pawhin an sawi thin a, kalphung thar an tihah an sawi tel thin.
Chutiang a nih laia chief minister kuta party president nihna hlan a ni hian politics-ah titi a luah a, mahse chief minister hi an party president nghet chu a la ni lo.
An dan bu-a party vice president mawhphurhna an ziah dan chuan, “President awm loh hlanin president aiawhin party a kaihruai thin ang,” tih te, “President hmuh a ruaha hnawh khah a nih hma chuan president hna a chelh lailawk ang,” tih te a inziak.
Thu dawn danin, nikum lamah khan party president nihna hi chief minister kuta hlan tumna a lo awm tawh a, elected office bearer-te’n an lo pawm tawh. Mahse MLA zawng zawng leh PAC an thukhawm a, anni’n tha an tih loh avangin a tlang ta lo a ni.
Senior vice president leh vice president pahnih an awm laiin an kuta hlan a ni lo a, senior vice president hi chu taksa lamah harsatna a neih avangin April ni 23-ah banna a thehluh avangin, president charge la tura ngaih a ni lo. Ban a dilna hi April ni 28-ah executive committee-in an ngaihtuah dawn tih thu dawn a ni.
ZPM president atan Chief Minister
