ZPM sawrkar chet dan hi ram
tan a him loa, paihthlak a ngai
– MNF Legal Board
Party dang sawrkarna village council thenkhat thiat a, VC term a pawhtawi sak ngawt chu democracy rama thleng ngai lo, kan ram kal chho zel atana him lo a nih avangin local council/ village council inthlanah ZPM paihthlak an ngai tih MNF party chuan an sawi.
MNG Legal Board secretary David R Lalsawmtluanga chuan, ZPM sawrkarin mipui rorelna bulthut, VC leh LC te chunga kut a thlak dan, party dang VC an nih avang ngawta VC thenkhat a thiah (dissolve leh suspend) na High Court-in a hnawl sak mawlh mawlh han hriat hian, ZPM sawrkarin lalna leh thuneihna a duh huam huam zia a nemnghet tih a sawi.
VC dinglai 558-a 324 chu MNF an ni a, INC 69 leh ZPM 38 niin, LC dinglai 59-a 50 chu MNF, INC 4 leh ZPM 1 an ni a. Heng VC 558 leh LC 59 hi mipuiin kumin August thlenga atan duh taka kan thlante an nih laiin, ZPM party an nih loh avang ngawta an namthlu leh an thuneihna thla 6 chuang an hnehchhuh leh, democracy rama la thleng ngai lo an ti mawlh mawlh mai chu ram kal chho zel atan a him loa, VC leh LC inthlanpuiah mipui duhthlanna rapbettu ZPM paihthla turin Mizoram mipui an ngen tih a sawi a ni.
Champhai leh Khawzawl district-ah ringawt VC 5 – Ngur, Hnahlan, Thekpui, Zawlsei leh Sialhawk VC chu an awm tha hle hle lai sawrkarin a namthlu ringawt tih NF Legal Board hruaitu hian sawiin, VC pathum hi Gauhati High Court Aizawl Bench-ah an zualko a, Hnahlan leh Thekpui VC thiah dan hi leilung pianken rorelna dik (principles of natural justice) kalh a ni tih sawiin, VC thiahna thupek a sut a, a hnawl vek bakah heng VC-te hian an hna pangngai an chhunzawm theihnan hma la turin sawrkar a hriattir tih a sawi.
Hetiang bawk hian Sialhawk VC chungchang pawh High Court-in thutlukna siamin, sawrkarin a suspend-na a thiahsak a, an hna an thawh chhunzawm lehnghal theihnan hma la turin sawrkar a hriattir tih a sawi a ni.
“High Court rorelna viak tha tak Mizoramin nei lo phei ila chuan, dictator sawrkar hnuaia awm ang maiin Mizo mipui hi rahbehin kan awm dawn tih a chiang a ni,” David R Lalsawmtluanga hian a ti.
Ngur VC thiah hi ZPM sawrkar duh danin 2024 August 24 khan by election hmangin mipui court-ah fiah a ni a; itsikna nena an thiah tak MNF party tho in mipui khawngaihna dawngin hnehna sang tak neiin VC an siam tih a sawi.
“Hetianga mipui rorelna thiat buan buantu ZPM hi a theihna zawn zawna paihthla ve zel turin MNF chuan mipui kan sawm a. VC member 2400 chuang leh LC member 360 chuangte hun thla ruk chuang chhuhsak hi engti kawng maha sawimam theih a ni lo,” a ti.
Zirlai naupang exam lai, chhungtin kan buai em em lai taka VC leh LC inthlan hun an han ruat tlat pawh mak an tih thu sawiin, zirna ngaihsak miah lo sum leh thuneihna atchilh sawrkar dik tak nia an hriat thu MNF Legal Board hruaitu hian a sawi bawk.
ZPM sawrkar chet dan hi ram tan a him loa, paihthlak a ngai – MNF Legal Board
