ZPM sawrkarin BJP an hlau hle – C Ngunlianchunga

ZPM sawrkarin BJP an hlau hle
– C Ngunlianchunga
ZPM sawrkarin BJP an hlau hle tih District Council boruakah a hriat tih Congress MLA C Ngunlianchunga chuan a sawi.
Zirtawpnia Congress Bhavan-a inkhawmah MPCC vice president ni bawk C Ngunlianchunga chuan, chief minister-in BJP a hlau em em a, an tel loin District Council-ah ZPM-in sawrkar an siam ngam lo tih a sawi.
LADC-ah MNF leh ZPM-in sawrkar siam tumin thuthlung an ziak a, chawlhkar thum a ral hnuah pawh larsap office atangin engmah hmalakna a awm loh avangin MNF lam khan ZPM hotulu lamin sawrkar siampui turin an duh lo nia ngaiin Congress sawrkar siampui turin an sawm ta zawk tih a sawi a ni.
“ZPM sawrkar hian BJP an hlau hle a, kan larsap pawh hian engah mah a ngai lo niin a lang. Larsap office atangin file an nawr chhuak hleithei loa, Hmanni lawka Council of Minister-in CADC chungchanga an thurel pawh engah mah ngai loin a suspend chhunzawm zel a ni,” a ti.
ADC sawrkar a tluk chuan larsap-in administrator a ruat thin a, tunah administrator tumah ruat an ni loa, regular-a thawkten hlawh mumal an la hleithei lo tih a sawi bawk.
Mizoram mipui nuai 12 vel hian diknaa rorelsaktu an mamawh tih C Ngunlianchunga hian sawiin, “Mipui hi i bum i bum loang u. Chief minister hmasa Pu Zoramthanga khan thudik a sawi thin ti ila, miin an ngaihdan chu in hre mai ang. Tun ami hian kan CM hmasa kha a khum an ti. Political platform-a kan din vang hian dawt kan sawi mai mai tur a ni loa, thudik kan sawi tur a ni,” a ti.
LADC inthlanah Congress-in hma an sawn em em a, mite pawhin Congress an lo tha ber, an ti tan tawh niin a sawi. “Mizoram siamtha turin kan sawrkar leh ngei ang,” MPCC hruaitu hian a ti.