Rahul Gandhi-an V. D. Savarkar a sawisel avanga Maharashtra Vikas Aghadi (MVA) alliance a boruak titoh awm mekah Maharashtra Vikas Aghadi (MVA) alliance chuan palai hna thawkin Shiv Sena tena an ngaihmawh chu Congress hruaitute hnenah a thlen.
Opposition leader chuan Congress te chuan Savarkar sawiselna laka insumkarna neih an remti tiin a sawi bawk a. Savarkar sawisel avang hian Shiv Sena te chu an lawm lo hle a. Maharashtra-ah hian NCP, Shiv Sena leh Congress te chu thawkho an ni.
Pawar chuan March 27 tlai lama Congress President Mallikarjun Kharge te nena inhmuhna an neihah Savarkar chungchang hi a sawi a, Maharashtra-a ngaihsan hlawh em em a nih avangin sawisel chuan rah tha a chhuah dawn loh thu a hrilh a ni.
He meeting-ah hian Congress President thin Sonia Gandhi leh Rahul Gandhi te pawh telin Pawar chuan Rahul Gandhi hnenah Savarkar chu RSS member a nih ngai loh thu sawiin Opposition tena an beih ber chu Prime Minister Narendra Modi leh BJP te an ni zawk, a ti a.
BJP te chuan tun hnaia UK a zinnaah Rahul Gandhi chu a thusawi hmanga India hmel tibalah puhin ngaihdam dil turin an phut nasa mai a. Mahse, Wayanand Lok Sabha member ni thin Rahul Gandhi chuan Savarkar a nih loh avangin ngaihdam a dil dawn lo tiin a chhang a ni.
Hei hian inhnialna siam zuiin Maharashtra Chief Minister hlui Uddhav Thackeray chuan Rahul Gandhi chu sawiselin an party chuan freedom fighter te hmuhsitna lam chi reng reng an tei thei dawn lo a ti zui a ni.
Hei mai hi ni lovin Thackeray faction Shiv Sena te chuan Kharge an opposition meeting a kohah pawh Rahul Gandhi an Savarkar chungchang a sawi dan an duh loh zia lantir nan an tel loh phah bawk.
Rahul Gandhi vangin India politics buai zui zel
![](https://theaizawlpost.org/wp-content/uploads/2023/03/rahul-2.jpg)