£123m lekah Arsenal boss Arteta la duhtawk lo!

£123m lekah Arsenal boss Arteta la duhtawk lo!
Season liamta Premier League-a pahnihna leh Champions League semi-final thleng pha bawk Arsenal chuan tun nipui insuan hun lai hian an squad thuamchakna atan pound maktaduai 123 chuang an sengral tawh a, club thuneitute sum phawrh zatah hian an manager Mikel Arteta a la lungawi lo a, squad nghet leh quality zawk din chhuak tura an la insen belh ngaihna lai a sawichhuak.
Gunners pawh hi tun nipui bazar-a buai ber pawl niin, mi thar thiau – Martin Zubimendi, Kepa Arrizabalaga, Christian Norgaard leh Noni Madueke-te manah belhkhawmin pound maktaduai 123.5 an phawrh tawh a, tuna inbiakna an kalpui leh mek pahnih hi an puitlin theih chuan pound maktaduai 63.5 (73.5m euros) sen belhna tur a ni.
Tun dinhmunah Sporting striker Viktor Gyokeres lei turin an dawr mek a; Valencia atanga defender la naupang tak Cristhian Mosquera lakchhuah tumin Spaniard-ho nen inbiakna a kal mek bawk.
Arsenal hi Sweden international kum 27 mi Gyokeres senglut turin an inringtawk hle tawh a, pre-season tour an kalpui tan mekah pawh an telh fel der tawh a; heti chinah hian Arteta a la duhtawk lo a, Asia khawmualpui lama hruai tur mi thar dang a la beisei mek tih a sawi.
Arsenal hian Singapore thleng tawhin, he khawpuiah hian AC Milan leh Newcastle an infiampui zet ang a, season thar atana inbuatsaihna kal zelah Hong Kong pan lehin, tah chuan English club dang Tottenham nen friendly match an khel zui leh dawn a ni.