Academic session kal mekah 1st term exam dawnah pawh zirlaibu la dawng kim lo sikul sang chuang an awm tih Congress Thalai chuan sawiin, Education minister Dr Vanlalthlana chak loh vang leh sawrkar sikula zirlaite ngaihthah vangah an ngai tih a sawi.
Congress Thalai Hqrs. thuchhuak chuan, July 15 atangin Mizorama school hrang hrangten term exam hmasa ber an hmachhawn tan tawh laiin, zirlaibu dawng kim lo sikul 1200 chuang an la awm tih a sawi a. Mizoram zirna sawpchhiatna a thleng mek tih a sawi.
RTI hmanga zawhna chhan danin, kuminah zirlaibu la dawn kim lohna primary school 581, middle school 689 an awm a. Aizawl district-ah school 309 (primary 173 leh middle 136), Mamit district-ah school 236 (primary 130 & middle 106), Lawngtlai district-ah school 206 (primary 122 & middle 84), Lunglei district-ah 164 (middle school vek), Kolasib district-ah school 88 (primary 30 & middle 58), Hnahthial district-ah school 86 (primary 49 & middle 37), Champhai district-ah school 62 (primary 28 & middle 34), Saitual district-ah school 37 (primary school vek), Khawzawl distrct-ah 36 (middle school vek), Serchhip district-ah school 33 (middle school vek), Siaha district-ah school 13 (primary 12 & UPS 1) an ni tih a sawi.
‘First term exam an nei tawh mek laia zirlaibu an la dawng kim lo hi Education minister chak loh zia chiang takin a langah kan ngai a. Social media vela lar khela tal mai mai loin, a mawhphurhna hlen chhuak a, zirlaite harsatna a ranglama sukiang thuai turin kan ngen a ni,’ a ti.
1st term exam dawnah zirlaibu dawng kim lo sikul sang chuang – Congress Thalai
Get real time updates directly on you device, subscribe now.