2024 Miss Mizoram Sub Title Night hmang

On Apr 25, 2024 16 0

2024 Miss Mizoram chu a hmawr an bâwk dawn hnai ta a, nizan hmasa khan Saizahawla Arcade, Tanhril-ah Sub Title Night hmangin sub title paruk an sem a, Zirtawpni zanah Saizahawla Arcade-ah bawk hian grand finale neih a ni dawn ta. Sub Title Night-ah hian contestant-te evening gown nen an inlan vek bawk a ni.
Sub Title Night-ah hian sub title zawng zawng sem nghal vek a ni lo a, Beauty With a Purpose (BWAP), Miss Beautiful Skin, Miss Congeniality leh Peoples Choice te grand finale-ah hian sem leh a ni ang.
Sub Title Night-ah hian Aizawl Open Audition atanga tel Jennifer Lalrinzuali Renthlei, Republic Veng chuan sub title pahnih- Miss Rampwalk leh Miss Photogenic a dawng a, Aizawl Open Audition atanga tel tho Evelyn Zachhingpuii, Saikhamakawn in sub title pahnih- Miss Personality leh Miss Body Beautiful a dawng a, Aizawl Open Audition atanga tel bawk Judith Lalramengmawii, ITI vengin Miss Active a dawng a, Miss Talented chu Siaha atanga tel M Lalrinchhani’n a dawng ve thung.
Sub Title Night-ah hian contestant atangin Lalsangkimi leh Mizo Dance Camp crew te an lam a, Judtih Lalramengmawii leh L Lalnuntluangi, Lawngtlai District ten zaiin mipui an awi a, M Lalrinchhani, Siaha, PC Lalruatsangi, Saitual leh T. Lalmuanpuii te talent video clip play a ni bawk.
2024 Miss Mizoram-ah hian contestant 18 telin, Aizawl atangin pariat leh district hrang hrang atangin aiawh pakhat theuh Disctrict MJA-in an thlan te an tel bawk a, grand finale-ah hian traditional dress round a la awm a, chumi hnuah top 10 thlangin, top 10 tan hian Question & Answer round a awm a, chumi hnuah Top 5 thlan leh a ni ang a, Top hian zawhna inang an chhang leh dawn a ni.
Kumin Miss Mizoram hi lawmman a la that ber kum a ni a, ‘Miss’-in lawmman Rs 2,00,000 bakah Vespa Scooter a dawng dawn a, hei bakah Women & Child Development-in an department ambassador-a an hmang nghal dawn a, Lash Studio atangin gift a dawng bawk ang.
Pahnihnain (1st Runner Up) Rs 1,00,000 leh Lash Studio atangin gift a dawng a, Pathumna (2nd Runner Up)-in Rs 50,000 bakah Lash Studio atangin thilpek a dawng bawk ang.
Top 5 a lang, top 3 a inhlangkai ta lo ten Rs 25,000 theuh an dawng ang a, top 10-a lang mahse, top 5 inhlangkai ta lo ten Rs 15,000 theuh an dawng ang a, top 10-a lang lo, finalist dang zawngin Rs 10,000 theuh an dawn bakah sub title pakhatin lawmman Rs 10,000 zel a keng tel dawn bawk a ni.