2025 ACM Awards-ah Lainey Wilson leh Ella Langley an langsar

2025 ACM Awards-ah Lainey Wilson leh Ella Langley an langsar
60th Academy of Country Music Awards chu nimin tuk khan Ford Center, Frisco, Texas-ah an sem ta a, Lainey Wilson leh Ella Langley te an langsar ber a, Wilson hian award pali dawngin, Langley hian award panga a dawng ve thung. Langley hian award a dawng hnem zawk nain Wilson hian award ngaihhlut ho a hui ve thung.
Wilson hian award ngaihhlut entertainer of the year leh album of the year a dawng tel a, entertainer of the year hi a kum zawna a dawnna niin, 2016-18 a kum thum chhung Jason Aldean-a’n a zawna a dawn hnua he category-a award a kum zawna dawng leh thei hmasa ber a ni a, 2009-10-a a kum zawna Taylor Swift-i’n a dawn hnua hmeichhe zaithiam zinga he category-a a kum zawna award dawng leh thei hmasa ber a ni bawk.
Wilson hian a album ‘Whirlwind’ avangin album of the year a dawng a, he category-ah hian nikum hmasa khan a album ‘Bell Bottom Country’ avangin award a lo dawng tawh bawk a, ‘Whirlwind’ leh ‘Bell Bottom Country’ inkarah hian studio albunm dang a tlangzarh lo a, a studio album tihchhuah indawtin album of the year a dawng ve ve tihna a ni a, ACM history-ah hetiang ti thei zaithiam pasarihna a ni.
Wilson hian female artist of the year pawh dawngin, he category-ah hian zawnin kum thum award a dawnna a ni ta a, artist-songwriter of the year a dawng tel bawk.
Ella Langley leh Railey Green ten an duet hit zet mai ‘you look like you love me’ avangin award pathum- single of the year, music event of the year leh visual media of the year an dawng a, Langley hian visual media category-ah award pahnih, artist leh director angin a dawng tel a, new female artist of the year a dawng bawk.
Old Dominion-in group of the year an dawng leh ta a, he award hi a zawnin kum riat an dawng tling ta a, Rascal Flatts kalsanin, he category-a award dawng ngun ber record an siam ta a ni.
Brooks & Dunn te pawhin duo of the year an dawng a, he category-ah hian 2010 hnua award an dawn lehna hmasa ber a ni. He category-ah hian Dan + Shay leh Brothers Osborne ten tun kum riat kalta chhung khan award an indawn chhawk zak zak a, kumin Brooks & Dunn hun a thleng ve leh ta a, anni hian he category-ah hian award vawi 17 an dawng tling ta a, record an siam.
Chris Stapleton-a’n male artist of the year a tum nga nan a dawng a, he category-a award dawng ber record intawm mek Merle Haggard, George Strait leh Brad Paisley te a nih rual ve ta bawk.
Award sem hmaa an lo puan lawk tawh angin Zach Top-a’n new male artist of the year a dawng a, The Red Clay Strays ten new duo or group of the year dawngin, Jessie Jo Dillon chuan songwriter of the year a dawng a, Jessie hian a kum zawnin he category-ah hian award a dawng ta a ni.
Kumin ACM Awards-ah hian Alan Jackson hnenah lifetime acievement award hlan a ni a, Keith Urban nenah Triple Crown award hlan a ni bawk.
Hetirual hian nomination-a langsar tak, country khawvela huhang nei lian thiau, Morgan Wallen (nomination pasarih), Post Malone (nomination panga) leh Kelsea Ballerini (nomination pali) te kut ruakin an haw tlat mai!
Ella Langley & Lainey Wilson
2025 ACM Awards winners
Entertainer of the Year : Lainey Wilson
Female Artist of the Year : Lainey Wilson
Male Artist of the Year : Chris Stapleton
Duo of the Year : Brooks & Dunn
Group of the Year : Old Dominion
New Female Artist of the Year : Ella Langley
New Male Artist of the Year : Zach Top
New Duo or Group of the Year : The Red Clay Strays
Album of the Year : Whirlwind – Lainey Wilson
Single of the Year : “you look like you love me” – Ella Langley, Riley Green
Song of the Year : “Dirt Cheap” – Cody Johnson
Music Event of the Year : “you look like you love me” – Ella Langley, Riley Green
Visual Media of the Year : “you look like you love me” – Ella Langley, Riley Green
Artist-Songwriter of the Year : Lainey Wilson
Songwriter of the Year : Jessie Jo Dillon