2025 AMA chan loh khan a chhuak! Award dawng lo langsar TaylorSwift

2025 AMA chan loh khan a chhuak!
2025 American Music Awards an sem takah chan loh khana chhuak a awm nual a, Billie Eilish-i’n nomination a neihna zawng zawngah award a dawng vek a, chutihlaiin Taylor Swift-i’n nomination a neihna parukah award pakhatmah a dawng lo!
Award thenkhat chu a dawng tura beisei leh rin lawk deuh ten an dawng a, Dan + Shay ten favorite country group a tum nga nana an dawn pawh tlang rinsa a ni a, Latin category lamah Bad Bunny leh Becky G te pawh che tha tura rinkai an nih ang ngeiin an chetha a, R&B lamah SZA chu rin ang ngeiin a chetha a, Afrobeat lamah award dawng tura tlang rin Tyla-i’n a dawng ngei bawk.
AMA record nei tha ber, award 40 dawng tawh Taylor Swift-i’n kuminah nomination paruk nei chungin award a dawng tlat lo hian mak tih a hlawh riau. Nikum lamah a boruak a lian a, ani aia rimawi khawvela huhang nei lian an awm chuang lo, mahse, award a dawng tlat lo. Swift hi Grammy-ah pawh khan a hawi hil deuh titih tawh bawk.
Kumin AMA hi 2007 hnuah Swift-i’n award a dawn loh vawi khatna a ni a, 2007 khan favorite country female artist-ah nominate a ni a, mahse, Carrie Underwood-i’n award a dawng ta zawk. Kumin hian nomination a neihna categiry paruk zinga panga- artist of the year, album of the year, favorite touring artist, favorite female pop artist leh favorite pop album-ah te Billie Eilish-i’n award a dawng vek a, kumin chu Eilisha ngam lo a ni ber e.
Swift ang bawkin Chappell Roan leh Shaboozey leh Sabrina Carpenter te pawhin nomination an neihna zawng zawngah award an dawng lo vek a. Ani pathum hi Taylor Swift thiantha tak an ni vek bawk! Chappell Roan leh Shaboozey te hian nomination pasarih ve ve neiin, award an dawng lo a, Sabrina Carpenter pawhin nomination paruk neiin, award a dawng lo bawk.
Kumin AMA nomination-a langsar ber Kendrick Lamar chuan nomination 10 a neih zingah award pakhat chiah a dawng a, ‘Not Like Us’ avangin favorite hip-hop song a dawng. Nikum leh kuminah pawh ni se hip-hop khawvelah na na na chuan Lamar aia boruak nei lian an awm lo ang, chuti chung cuan favorite male hip-hop leh favorite hip-hop album-ah Eminem a ngam tlat lo!