2028 Los Angeles Olympics-ah boxing an paihchhuak dawn lo!

2028 Los Angeles Olympics-ah boxing an paihchhuak dawn lo!
Khawvela infiamna lar leh hlun, boruak nei lian em em ni reng thin boxing chu Olympic-ah dinhmun him lo takah a ding a, Olympic sport ni lo thei mai dinhmuna a din hman ren rawn hnuah vote hmangin International Olympic Committee (IOC) chuan Olympic inelna ni zui zel turin thu an titlu.
Boxing inawpna lamah buaina a awm a, sum hman dan, refereeing leh ethical issue lamah harsatna lian tak an tawk bawk a, kum 2019 khan Rissian pa kaihhruai International Boxing Association (IBA) chu chawlhtir rih, bantir rih (suspend) niin, khawvel huapa boxing khaikhawmtu pawl thar World Boxing din a ni a, hruaitu thar hnuaia pawl thar chuan theihtawp chhuahin Olympic sport nih zui zel dan tur an ngaihtuah a, tunhnaia bukna a hmachhawn hnuah Los Angeles khawpuiin 2028 Games a thlen hun atan boxing telh zui zel an phar tlu ta a ni.
Tarlan tak angin, kum 2022 khan Olympic Games awm leh tur atana programme an tihchhuahah boxing hi telh a ni lo zet hman a, mahse, IOC chuan thla hmasa khan World Boxing chu thu leh awm hma atana pawimpuina (provisional recognition) a pe a, tunhnaia Greece rama IOC thutkhawmnaah Los Angeles Games atan boxing chu an pawm leh ta hram a ni.
IOC president kal chhuak tur Thomas Bach chuan khawvel huap boxinh pawl pawmpuina pek a ni leh ta lawmawm a tih thu sawi chungin Los Angeles Olympic-ah hian boxing tournament ropui tak beisei a nih thu a tarlang tel.
Kum 1912 tih loh chu kum 1904 atang khan boxing hi Olympics zawng zawngah a la tel kim vek a, mahse, mahse, kum 2019-a IBA suspend a nih hnu khan Olympic Games hnuhnung pahnihah boxing hi IOC enkawlna hnuaia khelh niin, Russian hruaitu kaihhruaina hnuaiah International Boxing Association chuan insiamthat lam a pan loh avangin kum 2023 June khan IBA chu IOC lama a dinhmun phehthlaksak a ni.
Chuti chung chuan nikum Paris Olympic-ah khan IOC leh IBA chu boxer pahnih Games-a inlan chungchangah an intawng chiam a, pawl pahnih inbauhna chhan boxer-te chu Taiwan boxer Lin Yu-ting leh Algeria aiawh Imane Khelif-te an ni.
He’ng fighter pahnihte mipa an nih leh hmeichhia an nih endikna (gender eligibility tests) an paltlang zawh loh avangin 2023 World Championships-ah khan IBA chuan a teltir duh lo a, Paris Games-ah pawh tel lo se an duh a, mahse, IOC lam chuan an tel a phalsak a, an khelhna weight class ve veah gold medal an awrh dun nghe nge!
A kahpah deuhin han lut leh thin ila, IOC berin IBA a pawmloh hnu khan April 2023-ah World Boxing din a ni tih tarlan a ni tawh a, he pawl thar hi a thangduang nghal hle a, tun thlengin khawmualpui panga tuam tawhin, member ram 84 an awm tawh a, an zingah hian Great Britain pawh an tel nghe nghe.
Ti chuan, Los Angeles Games 2028-a Olympic sport ni lo thut thei dinhmuna ding hman boxing chuan a dinhmun ngai a luah chhunzawm dawn tih nemngheh a ni ta a; vote hmanga boxing dinhmun tihchian a nih hnu hian World Boxing president Boris van der Vorst chuan thuchhuah siam nghalin, “Vawiin hi boxer zawng zawng leh boxing bakah he sport nena inzawmna nei zawng zawngte tan ni ropui a ni.
“World Boxing chuan Olympic Games-a tel hi hamthatna a ni tih a hrechiang a, Olympic Movement chak takah hian thawhpui rintlak nih zui zel kan tum dawn a ni,” a ti.
Tunhnaia Greece rama IOC thukhawm chuan 2028 Olympics-a tel tur zawnna (qualification event) tan a nih laia World Boxing-a tel national federation aiawh infiammite chauhin Los Angeles Games-ah inelna an hmachhawn thei dawn tih an pawm a, mahse, qualifying hun tan hun erawh nemngheh a la ni lo thung.