Sub Committee on Overall Coordination on G20 meeting chuan Ningani khan Aizawl mayor Lalrinenga Sailo leh a thawpui corporator-te chu Mizoramin kumin March 2-a G20 Business meeting a thlen tura an hriat tur tul an hrilh.
-- Advertisement --
Sub Committee member secretary David H. Lalthangliana chuan G20 Business meeting pawimawh dan, Mizoramin he meeting a thlen tur inpuahchahna kalpui tawh chin leh ruahmanna duan chin sawiin, hengah hian AMC thawhpuina leh tawiawmna an mamawh dawn tih a sawi. A bikin ram dang palai, he meeting-a tel turten Mizoram chu state fai tak, nuam leh mipui hawihawm tak tia an hmuh leh hriat theih nan, an kalna tur hmunhma vawn leh enkawl a, bawlhhlawh thlahdah loh leh hawihhawm taka lo dawnsawn te a pawimawh dawn avangin local council-te thlengin a pawimawh dan an hriat a tul tih a sawi a ni.
Aizawl mayor chuan G20 meeting hlawhtling taka neih theih nan Aizawl Municipal Corporation chuan a tul tul a ti dawn tih sawiin, hemi kawnga a buaipuitu, a bikin Home department leh Sub-Committee hrang hrangten AMC finchhuah tur leh a tul apianga amah leh corporator-te an inhawn reng thu a sawi.
Mizoram hian G20 Business meeting hi March 2-ah a thleng dawn a. Aizawl tiamin hmarchhak khawpui hrang hrangah G20 meeting chi hrang hrang tum 14 neih a ni dawn a, February leh April inkara neih tur a ni. Assam leh Sikkim tih lo hmarchhak state dangte chuan tum khat theuh G20 meeting an thleng dawn a, Assam-in meeting 4 leh Sikkim-in meeting 2 an thleng dawn a ni.