PWNM leh Lalsawta inkawm

HIV kai hmeichhiaten pawl an din, Positive Women Network of Mizoram (PWNM) office chu MPCC president Lalsawta chu Thawhtanni khan a tlawh a. Mizorama HIV a tlakhniam theihna tura kawng awm leh hmalak dan tur an sawiho.
MPCC president chuan, nun hona kawngah nasa zawka kan harsatna leh inpuih kan ngaihnaah tan lak ho a tul tih a sawi a. Harsatna in a tuaihriam loh mihring an chhawr tlak loh thu leh harsatna paltlang a, beidawnna leh manganna hmachhawntute hlawhtlinna chu a hlut bik thu a sawi. “Vanduaina kan chunga a thlenin indawmkan leh inpuih tawn hi Lal Isua min zirtir dan a ni a. Harsatna kan tawhin vanduai bika inngaihna hian rilru dik lo min pe a, kan nih tur ang ni phak loin min pawtthla thin. Pathian rawngbawltu hlawhtling leh khawvela mi hlawhtlingte hi harsatna tam tak paltlang an ni a. Isua zirtirten harsatna tam tak paltlanga an thawhna azarah keini pawh tun dinhmunah kan din phah a ni,” a ti.
“Mihring famkim lo kan ni a, kan hun kal tawhah tih fel loh tam tak kan nei thei. Nimahsela hun liam tawh chu koh kir theih a ni lo. Tuna kan tih tur hmasa ber chu kan ram, kan hnam leh kan rinna humhim turin keini leh nangni tana kan thawh a hun takzet a, kan tihmakmawh a ni,” Lalsawta hian a ti bawk.
PWNM hruaitute chuan harsatna tam tak paltlanga PWNM din tan dan leh hma an lak dan, sawrkar nena an thawhona hrang hrang, kohhran hrang hranga Kohhran Hmeichhiaten an thawhpuina an hlawkpui zia bakah Mizorama HIV dinhmun sawiin, inenkawlna tha dawngtute dinhmun leh an harsatna an sawi a. HIV darh zel tur ven kawngah thawktute hmalakna ruahmanna tha zawk nen hmathar lak a ngaih tih sawiin, HIV vei hman lo khawpa kan inbuatsaih a ngaih dan an sawi bakah ‘Sex City’ an tih khawpa mipat hmeichhiat hman hluarna Bangkok leh Cambodia-ah te meuh pawh HIV an khuahkhirh thei tih an sawi a. Ruahmanna tha zawk nena hmathar lak a nih chuan Mizorama HIV dinhmun khuahkhirh theih a nih dan an sawi bawk.
MPCC president hian PWNM tanpuina sumfai a hlan a ni.