Vawiin thlengin MNF-in BJP a la thlawp – ZPM

BJP duh lohna nasa tak awm mek karah Mizorama ruling party MNF chuan tun thlengin an la thlawp a, hei hi Parliament-ah pawh a la lang tih ZPM Thalai chuan an sawi.
ZPM Thalai vice president Laltanpuia Zote chuan Manipur-a BJP sawrkar hnuaiah Zohnahthlakten harsatna tam tak an tawh mek karah pawh MNF chuan BJP a thawhpuina chu a la titawp lo tih sawiin, Mizoram MP pahnihte pawh Parliament-ah BJP karah vawiin thlengin an la thu thu tih a sawi. BJP dodalna reng reng an chhak chhuak ngam lo nia sawiin, BJP leh an sangawi zawnpuite inkhawmpuiah pawh palai tirin, Lok Sabha MP C Lalrosanga chu a kal ve hial tih a sawi.
Chakma Autonomous District Council inthlanah Congress party chu a mala a sawrkar theih loh avangin ‘United Legislature Alliance’ tia hming vuaha BJP thawhpuiin, sawrkarna an lo siam dun tawh tih ZPM Thalai hruaitu hian an sawi a. Mizoramah Congress party chu Mizorama BJP a chhiat ber lai pawha lo tuamhlawmtu leh thawhpui duhtu an ni tih hi a langchiang hle tih a sawi bawk.
Mizorama political party lian zingah an party chauh chu BJP la thawhpui lo awmchhun an ni tih a sawi a. Congress leh MNF chetdan chu zahtheih loh thlak an tih thu sawiin, “Lalna leh thuneihna an channa tur a nih chuan Congress leh MNF party hian anmahni leh anmahni bakah Kristian tana party hlauhawm BJP thawhpui hi engtik lai pawhin an inring reng a ni,” Laltanpuia Zote hian a ti.