State DMA-in chhiatna thlenga hmalakna thlirho
Mizoram State Disaster Management Authority chu an chairman, chief minister Zoramthanga hoin Thawhlehni khan an thukhawm a. Kumina an hmalakna, hmachhawp leh tunhnaia hmun hrang hranga leilung chhiatna thleng an hmachhawn dan an sawiho.
Vaivakawn Zohnuai kawngpui leh a chhehvela leimin mek leh Tlabung RD Block huamchhunga tuilian leh leimin vanga harsatna tawh mek sawiin, Vaivakawn Zohnuai leilung awmdan hi tuna a tihnep theihna tur chi (short term mitigation) hrang hrang kalpui nghal a nih bakah nakina tha taka kawngpui kaltlangtir leh theihna tura ruahmanna siam a ni a. He ruahmanna hi National Disaster Management Authority-a thlen tur a ni.
Tlabung leh a chhehvelah tuilian vangin chhungkaw engemawzat hmunhim lama sawn chhuah an nih tawh thu leh an chen lailawkna tur hi Lunglei district bawrhsap leh Tlabung SDO (Civil) ten an ngaihtuah nghal thu te; buhfai supply, power supply, inbiakpawhna lamah harsatna a thlen belh lohna’n hma lak zui a nih thu te sawi a ni.
Lawngtlai district khawthlang lamah pawh tuilian vanga harsatna a awm nia sawi chu District Disaster Management Committee atangin State DMA hian report a ngaichang mek a, a tul anga hma la nghal tura inbuatsaih a ni tih sawi a ni.
Thutkhawmah hian Mizoram State Disaster Management Plan 2023, district hrang hrang Disaster Plan 2022 te an pawm bakah SDMA Work Plan 2023 leh Purchase of Disaster Management Equipments proposal pawm a ni bawk.
Disaster Management & Rehabilitation secretary K Lalrinzuali report danin, kumtir lam khan State Level Mega Mockdrill neih a ni a, Aapda Mitra Scheme hnuaia volunteer training mi 500 pek thar niin, insurance tihsak vek an ni. Tlabung leh Sairanga Safe Shelter building sak tharte chu hawn mai theih a ni tawh a, India ram puma hman theih chhiatna leh rikrum thila phone-a biak tur – Emergency Response Support System No.112 chu chhunzan zawma vil a ni. Accident, kangmei leh tanpui ngaihna rikrum thil an tawh palha an biak mai theih emergency number hi hmang tangkai se an duh thu thtukhawmah hian sawi a ni.