Thorang biala chhiatna thleng MLA-in thuneitu hnenah thlen

Tunhnai ruahsur nasa avanga khuarel chhiatna nasa tak a bial chhunga thlengah Thorang bialtu MLA Zodintluanga chuan Disaster Management & Rehabilitation minister Lalchamliana leh PWD engineer -in- chief charge la mekte B. Lalawmpuia te chu an office-ah tlawhin hma laksak turin a ngen.
MLA hian a bial chhunga Tuichawng lui lian mekah Andermanik khua tuiin a chim avanga harsatna thleng, ruahsur nasa avanga Thorang bial chhung hmun hrang hranga chhiatna tawk mek leh Tleu Quarry chim avanga Phairuang Bunghmun Road inkalpawhna pingin harsatna a thlente a ranglama pui turin a ngen.
Minister leh PWD E-in-C hian Thorang bialtu MLA-in an office-a a dawr lai hian hma laksak nghalin, a tul angte an biakpawh sak a. Er. B Lalawmpuia hian Tleu Quarry chim hi kaltlang leh theih tura a theih ang anga hma lak nghal a nih tur thu Thorang bialtu MLA hi a hrilh a, theihtawp an chhuah tur thu a sawi. Home minister pawhin Lunglei DC bia in, thil awmdan an sawi a, a ranglama hma lak nghal a nih tur thu MLA Zodintluanga hi a hrilh bawk.