Gandhi pianchamah Raj Bhavan-ah fair neih rawt

Larsap Dr Hari Babu Kambhampati chuan Thawhlehni khan Raj Bhavan-ah Commerce & Industries secretary R Lalramnghaka, director Florence Zotluangpuii leh department hotu dangte a kawm a. Kumin Gandhi Jayanti (October 2) a handloom, handicrafts leh tualchhung kuthnathawktute thil siam dangte tihlarna atan fair/ exhibition buatsaih dan tur a sawipui.
State economy tan handloom, handicrafts leh cottage industry dangte a pawimawh tih larsap hian a sawi a. Heng kutchhuakte hian Mahatma Gandhi nen inzawmna nghet tak an neih thu leh India hnam pa pianchamphaa handloom leh handicraft fair buatsaih chu tih awm tak a nih thu a sawi. “Fair buatsaih a nih chuan, handloom leh handicraft hmanga eizawngtute tanpuina remchang leh kan kutchhuak vawrhlarna a ni dawn a ni,” tiin, mipui chu chhim tur leh kuthnathawktute kutchhuak pakhat tal leisak turin a sawm nghal tih a sawi a ni.
Larsap chuan exhibition neihna atan hian Raj Bhavan a rawt a, kuthnathawktu leh tualchhung entrepreneur-te chu he hunah hian an thilsiam phochhuak turin a sawm tih sawiin, hemi pual hian Raj Bhavan pawh mipui tan hawn a nih tur thu a sawi a ni.