Mont Blanc tlang sanna hniam tual tual

France rama tlangsang ber chu tun hnai kum hnih chhungin a hniam tial tial tiin researcher te chuan an sawi.
Mont Blanc hi 4,805.59m (15,766 ft) niin kum 2021 aiin 2.22m in a hniam tawh zawk a ni.
Chief geometer jean des Garets chuan a tlang hniamna chhan hi kumina ruahsur tlem vang a ni thei tiin a sawi a.
South east France a tlang hi kum hnih danah teh zel niin a chhan ber pawh Alps leh a chehhvela climate change nghawng hriatfiah chian tumna vang a ni.
Jean des Garets chuan kum 2001 atang khan Mont Blanc chu an zirchian tan thu sawiin, “A tlangsang lai ber hi a inthlak reng a, a chang chuan metre nga lai ten a danglam thin. Kum hnih hnuah Mont Blac hi a la sang zawk thei bawk,” tiin a sawi.
Mahse tehna lo awm tawh te ngaihtuah chuan kum 2021 khan mithiam te chuan tlang chuan kum tinin a sanna 13cm in a hloh tial tial zawk tiin an sawi thung a.
“Heng data pawimawhte hi thangthar zel te tana kan lakkhawm a ni a. Sawifiah kan tum lo va, scientists te hnenah kan thlen zawk a ni,” tiin des Garets chuan a sawi.
Mont Blac sang lai ber hi sea level atanga tehin 4,792m a ni a, mahse a tlangchhipa vur awm dan azirin a san dan chu inthlak danglam a ni. Tlangchhipa vur awm chu thli leh weather azira danglam a ni a, kumina a hniamna chhan hi ruahsur tlem vang a ni thei an ti.
Thla kalta lawk khan Switzrland a glaciers te chu nasa takin a tuiral thung a, hei vang hian Scientists te chuan global warming a nasa zual zel tih lantirna tiin an sawi thung a.
Mont Blanc hi a hming lemah ‘roof of Europe’ tih niin kum tinin mi 20,000 atanga 30,000 vel tena na lawnchhuah thin a ni a. A tlang kawnga lun berah chuan nikhatah mi 214 bak kal phal a ni lo bawk.
Mont Blanc san lai ber record chu 4,810.90m niin kum 2007 khan record a ni.