Jordan King-in Gaza buainaah hlauhthawn nei

Jordanian King Abdullah II chuan Israel leh Hamas inbeihna chu a nasat zual zela ram dang a kangkai a nih chuan Middle East chu dinhmun chhe takah a ding ang tiin a sawi.
“He lai region pum hian buaina nasa zawk a tawng thei reng a ni,” tiin Abdullah chuan German Chancellor Olaf Sholz nena Berlin a inhmuhna an neihah a sawi a.
“Buaina nasa zawk a chhuah loh nan kawng engkimin theih tawp chhuah mek a ni,” tiin a sawi bawk.
Gaza-a inbun Hamas fighters te chuan October 7 khan nasa taka venhim Israel ramri chu paltlangin a chhehvel an run hnuah nunna chan 1,400 vel an awm tawh a ni.
Israel thinrim chuan chhang letin Hamas thunun Gaza chu nasa taka beizuiin Palestinians 2,750 chuangin nunna an chan phah tawh bawk.
Israel chuan a ramri hnaihah indona nasa zawk awm theia inpuahchah nan sipai sang tam tak a tirlut tawh bawk.
Israel chuan indona kalpui tak tak hmain Gazans maktaduai 1.1 vel zet te hmar lama awm te chu insaseng turin a lo hrilh sa tawh bawk a.
Gaza chhuahsan tum hian ramri Israel in a thunun loh awm chhun leh Egypt in a thunun Raffah crossing ah chuan mi sang tam tak an pungkhawm mek bawk.
Hetih lai hian Jordanian king chuan an ram chuan Gaza atanga Palestinian refugees te an dawng thei dawn lo ni awmin a sawi a.
“Jordan-a refugee lakluh chungchangah Jordan mai ni lo kan thian Egypt te pawh hmer telin fimkhurna tur a awm a ni,” tiin a sawi a.
Tun buaina thleng mek hi ‘Gaza chhungah leh West Bank-ah ngei chinfel ngai a ni,’ tiin a sawi bawk.